სახელმწიფო უსაფრთხოების სამსახურის თანამშრომელი დღეს დილით სუს-ის შენობასთან საკუთარ მანქანაში გარდაცვლილი იპოვეს. ინფორმაციას პროკურატურის პრესსამსახური ავრცელებს.
უწყების განცხადებით, გარდაცვლილს ცეცხლსასროლი იარაღით აქვს მიყენებული ჭრილობები.
"სახელმწიფო უსაფრთხოების სამსახურის ანტიკორუფციული სააგენტოს თანამშრომლის გარდაცვალების ფაქტზე, თბილისის პროკურატურის საგამოძიებო სამმართველომ გამოძიება სისხლის სამართლის კოდექსის 115-ე მუხლით დაიწყო.
ანტიკორუფციული სააგენტოს თანამშრომელი დღეს დილით საკუთარ ავტომანქანაში ცეცხლსასროლი იარაღით მიყენებული ჭრილობით გარდაცვლილი იპოვეს. შემთხვევის ადგილის დათვალიერებისას ამოღებულია ცეცხლსასროლი იარაღი, რომელიც გარდაცვლილს თან ჰქონდა და წერილი, რომელიც გვერდითა სავარძელზე იქნა ნანახი.
მიმდინარეობს შესაბამისი გადაუდებელი საგამოძიებო მოქმედებები." - ნათქვამია პროკურატურის განცხადებაში.
