იაპონიაში, ქალაქ ნარას საოლქო სასამართლომ 45 წლის ნარას მკვიდრს, ტეცუია იამაგამის, ყოფილი პრემიერ-მინისტრის, შინზო აბეს მკვლელობისთვის სამუდამო პატიმრობა მიუსაჯა. ბრალდებულმა დანაშაული აღიარა. იუწყება AFP.
პროკურატურამ სამუდამო პატიმრობა მოითხოვა, პრესსპიკერმა პოლიტიკოსის მკვლელობას „უპრეცედენტო“ უწოდა ქვეყნის ომისშემდგომ ისტორიაში და განაცხადა, რომ დანაშაულს საზოგადოებისთვის „უკიდურესად სერიოზული შედეგები“ მოჰყვება.
67 წლის შინზო აბეზე თავდასხმა 2022 წლის 8 ივლისს მოხდა. აბე 10 ივლისს დანიშნული საპარლამენტო არჩევნების კამპანიის ფარგლებში იმყოფებოდა ქალაქ ნარაში, სადაც, სიტყვით გამოსვლის დროს ორჯერ ესროლეს. ტეცუია იამაგამი ყოფილი სამხედრო იყო, მან დაკითხვისას განაცხადა, რომ უკმაყოფილო იყო აბეს პოლიტიკით.
ლიბერალ-დემოკრატი შინზო აბე იაპონიის პრემიერ-მინისტრი იყო 2006-2007 და 2012-2020 წლებში. ქვეყნის პრემიერ-მინისტრებს შორის, აბეს ეს თანამდებობა ყველაზე დიდხანს ეკავა. 2020 წელს, შინზო აბემ ჯანმრთელობის მდგომარეობის გამო დატოვა მმართველი ლიბერალ-დემოკრატიული პარტიის თავმჯდომარის და პრემიერ-მინისტრის თანამდებობები, თუმცა, პარტიაში ერთ-ერთ ყველაზე გავლენიან ფიგურად რჩებოდა.
