უკრაინის უმაღლესმა ანტიკორუფციულმა სასამართლომ 33,280,000 გრივნას ოდენობის გირაო შეუფარდა საპარლამენტო ფრაქცია „ბატკივშჩინას“ ლიდერს, იულია ტიმოშენკოს, რომელიც პარლამენტის წევრებისთვის ქრთამის შეთავაზებაშია ეჭვმიტანილი.
სასამართლომ ტიმოშენკოს, ასევე დააკისრა მთელი რიგი პროცედურული ვალდებულებები, მათ შორის სასამართლოს, გამომძიებლის ან პროკურორის მიერ გამოძახებისას გამოცხადება, კიევის ოლქის დატოვების აკრძალვა, საცხოვრებელი ადგილის ან სამსახურის ნებისმიერი ცვლილების შესახებ შეტყობინება, პარლამენტის გარკვეულ წევრებთან კომუნიკაციისგან თავის შეკავება და პასპორტების ჩაბარება.
ელექტრონული სამაჯურის ტარება სავალდებულო არ არის.
სასამართლოში გამოცხადებისას ტიმოშენკომ მოსამართლეს სთხოვა, საერთოდ არ დაეკისრებინა აღკვეთის ღონისძიება.
ტიმოშენკომ დასკვნითი სიტყვა წარმოთქვა. კერძოდ, „ბატკივშჩინას“ ლიდერმა კიდევ ერთხელ განაცხადა, რომ დეპუტატ კოპიტინთან მისი საუბრის აუდიოჩანაწერი თანამედროვე ტექნოლოგიების გამოყენებით იყო მომზადებული.
„სწორედ ამიტომ, უარი გვითხრეს დამოუკიდებელი ექსპერტიზის ორიგინალზე“, – განაცხადა ტიმოშენკომ.
სასამართლო სხდომაზე მან ასევე განაცხადა, რომ კოპიტინისთვის თანხები არ გადაურიცხავს. ამავდროულად, „ბატკივშჩინას“ ლიდერმა განაცხადა, რომ ამ პრევენციულ ღონისძიებას უმაღლესი ანტიკორუფციული სასამართლოს სააპელაციო პალატაში გაასაჩივრებს.
„ჩვენ გავასაჩივრებთ და დავამტკიცებთ, რომ ეს პოლიტიკური მკვლელობაა არჩევნების წინ“, – აღნიშნა ტიმოშენკომ.
ცნობისთვის, ანტიკორუფციულმა უწყებებმა „ბატკივშჩინის“ ხელმძღვანელი იულია ტიმოშენკო კორუფციაში ამხილეს და პარტიის ოფისში ჩხრეკა ჩაატარეს.
