დიდი ბრიტანეთი არ უჭერს მხარს საფრანგეთისა და იტალიის ლიდერების იდეას, განაახლონ პირდაპირი მოლაპარაკებები რუსეთის პრეზიდენტ ვლადიმერ პუტინთან, განაცხადა დიდი ბრიტანეთის საგარეო საქმეთა მინისტრმა ივეტ კუპერმა. ამის შესახებ მან Politico-თან ინტერვიუში ისაუბრა.
„ვფიქრობ, ჩვენ გვჭირდება მტკიცებულება იმისა, რომ პუტინს ნამდვილად სურს მშვიდობა და ჯერჯერობით ამას ვერ ვხედავ,“ - აღნიშნა მან.
კუპერმა ხაზი გაუსვა, რომ დიპლომატიის ცენტრი ახლა უკრაინასა და მის უახლოეს მოკავშირეებთანაა.
„ჩვენ ვხედავთ უზარმაზარ თავდადებას იმ სამუშაოს მიმართ, რომელსაც უკრაინა ახორციელებს შეერთებული შტატებისა და ევროპის მხარდაჭერით, რათა შეიმუშაოს მშვიდობის გეგმები, მათ შორის უსაფრთხოების გარანტიები. თუმცა, ჯერჯერობით ვერ ვხედავ ვერანაირ მტკიცებულებას იმისა, რომ პუტინი მზადაა მოლაპარაკებების მაგიდასთან დაჯდეს ან დისკუსიებში ჩაერთოს“, - აღნიშნა მინისტრმა.
სწორედ ამიტომ, მისი თქმით, მოსკოვზე ზეწოლა უნდა გაიზარდოს - და ეს სანქციებითა და სამხედრო მხარდაჭერით უნდა მოხდეს.
„ვფიქრობ, ამ მართლაც მნიშვნელოვან სამუშაოსთან ერთად, ჩვენ ჯერ კიდევ მზად უნდა ვიყოთ ზეწოლის, ეკონომიკური ზეწოლის და ასევე, უკრაინის სამხედრო მხარდაჭერის გზით, რუსეთზე სამხედრო ზეწოლის გასაძლიერებლად“, - თქვა კუპერმა.
