უკრაინის უსაფრთხოების გარანტიების შესახებ ორმხრივი დოკუმენტი, ფაქტობრივად, მზადაა აშშ-ის პრეზიდენტ დონალდ ტრამპთან უმაღლეს დონეზე გასაფორმებლად. ამის შესახებ უკრაინისპრეზიდენტმა ვოლოდიმირ ზელენსკიმ განაცხადა.
მისი თქმით, თავდაცვის მინისტრმა, რუსტემ უმეროვმა, მოლაპარაკებების შედეგების შესახებ ანგარიში წარადგინა, რომლის დროსაც მხარეებმა განიხილეს როგორც უსაფრთხოების გარანტიები, ასევე უკრაინის აღდგენისა და ეკონომიკური განვითარების დოკუმენტები.
„უკრაინის უსაფრთხოების გარანტიების შესახებ ორმხრივი დოკუმენტი პრაქტიკულად მზად არის შეერთებული შტატების პრეზიდენტთან უმაღლეს დონეზე გასაფორმებლად. მნიშვნელოვანია, რომ უკრაინამ გააგრძელოს ევროპული და ამერიკული გუნდების მუშაობის ინტეგრირება და ერთობლივად განიხილოს, კერძოდ, რეკონსტრუქციისა და ეკონომიკური განვითარების დოკუმენტები“, - განაცხადა ზელენსკიმ.
ზელენსკიმ აღნიშნა, რომ მოლაპარაკებების დროს განიხილეს ომის დასრულების ჩარჩოს რთული საკითხები და უკრაინულმა მხარემ წარადგინა შესაბამისი დოკუმენტის დასრულების შესაძლო ვარიანტები.
პრეზიდენტმა ასევე დასძინა, რომ შეერთებული შტატები რუსეთთან ცალკეულ კონტაქტებს გეგმავს და უკრაინა ელოდება გამოხმაურებას იმის შესახებ, ნამდვილად მზად არის თუ არა მოსკოვი ომის დასასრულებლად.
ამავდროულად, კიევი აგრძელებს პარტნიორების ინფორმირებას რუსული დარტყმების შედეგების შესახებ, რაც, ზელენსკის თქმით, კრემლის პრიორიტეტების ცვლილებაზე არ მიუთითებს.
გარდა ამისა, პრეზიდენტმა ხაზი გაუსვა რუსეთზე ზეწოლის გაზრდის აუცილებლობას მოლაპარაკებების პროცესის პარალელურად და განაცხადა, რომ სამომავლო უსაფრთხოების გარანტიების მიზანშეწონილობა უკვე უნდა დადასტურდეს პარტნიორების მიერ აგრესორზე ეფექტური ზეწოლის განხორციელების უნარით.
მისი თქმით, უკრაინა საერთაშორისო პარტნიორებთან ახალ კონტაქტებს ამზადებს.
