აშშ-ის პრეზიდენტი დონალდ ტრამპი და უკრაინის პრეზიდენტი ვოლოდიმირ ზელენსკი კვირას მარ-ა-ლაგოში შეხვედრას გეგმავენ, რათა უკრაინაში ომის მოსაგვარებლად აშშ-ის სამშვიდობო გეგმა დაასრულონ.
Axios-ის ცნობით, შეხვედრა მოლაპარაკებებში მნიშვნელოვან გარღვევას აღნიშნავს. ტრამპმა მანამდე განაცხადა, რომ ზელენსკისთან პირად შეხვედრაზე მხოლოდ მაშინ დათანხმდებოდა, როდესაც შეთანხმება მიღწეული იქნებოდა.
აშშ-ის მაღალი თანამდებობის პირების თქმით, რუსეთი დათანხმდა ცეცხლის შეწყვეტას, როგორც წინაპირობას შემდგომი პოლიტიკური ნაბიჯებისთვის, მათ შორის სადავო ტერიტორიების მომავალთან დაკავშირებით შესაძლო რეფერენდუმისთვის.
როგორც გამოცემა აღნიშნავს, ეს კრემლის პოზიციის ცვლილებას ნიშნავს, რომელიც ადრე ამტკიცებდა, რომ ცეცხლის შეწყვეტა მხოლოდ საბოლოო სამშვიდობო შეთანხმების მიღწევის შემდეგ იყო შესაძლებელი.
„რუსები, რომლებიც ადრე ცეცხლის შეწყვეტის შეთანხმების წინააღმდეგნი იყვნენ, ახლა აღიარებენ, რომ მის გარეშე შემდგომი ნაბიჯების გადადგმა შეუძლებელია“, - განაცხადა აშშ-ის ოფიციალურმა პირმა.
შეხვედრისთვის მზადება ფლორიდაში ტრამპის წარმომადგენლებს, სტივ უიტკოფსა და ჯარედ კუშნერს, ასევე უკრაინელ და რუს მთავარ მომლაპარაკებლებს შორის გამართული დახურული მოლაპარაკებების სერიას მოჰყვა.
მოლაპარაკებები შობის მთელი პერიოდის განმავლობაში გაგრძელდა.
ზელენსკიმ დაადასტურა შეთანხმებებზე აქტიური მუშაობა და აღნიშნა, რომ მხარეები „24-საათიან რეჟიმში მუშაობენ“, რათა სამშვიდობო პროცესი რეალისტური და საიმედო იყოს.
კრემლმაც დაადასტურა კონტაქტები: პუტინის საგარეო პოლიტიკის თანაშემწემ, იური უშაკოვმა, მოლაპარაკებები გამართა ამერიკელ წარმომადგენლებთან.
წყაროების ცნობით, შეერთებული შტატები და უკრაინა შეთანხმდნენ მომავალი შეთანხმების უმეტეს ელემენტზე, მათ შორის უსაფრთხოების გარანტიებზე.
ვაშინგტონი მზადაა სენატს წარუდგინოს უკრაინის უსაფრთხოების გარანტიების შესახებ ხელშეკრულება, რომლის ტექსტიც ნატო-ს წესდების მე-5 მუხლს ეფუძნება.
„თუ რუსეთი კვლავ შეიჭრება უკრაინაში, სამხედრო პასუხი იქნება და სანქციები ავტომატურად აღდგება“, - განაცხადა ზელენსკიმ.
