ევროპელი ლიდერები სუსტები არიან. ამის შესახებ აშშ-ის პრეზიდენტმა, დონალდ ტრამპმა Politico-სთან ინტერვიუში განაცხადა.
„ვფიქრობ, ისინი სუსტები არიან, მაგრამ ასევე, ვფიქრობ, მათ სურთ, რომ პოლიტიკურად კორექტულები იყვნენ. არ იციან რა გააკეთონ. ევროპამ არ იცის რა გააკეთოს. არ იციან ვაჭრობის შესახებ რა გააკეთონ. ევროპას სურს, რომ პოლიტიკურად კორექტული იყოს და ეს მათ სუსტს ხდის”, - განაცხადა დონალდ ტრამპმა.
მისი თქმით, „ევროპის საიმიგრაციო პოლიტიკა კატასტროფაა“.
"თუ ასე გაგრძელდება, მაშინ ბევრი ევროპული ქვეყანა აღარ იქნება სიცოცხლისუნარიანი სახელმწიფო. რასაც ისინი იმიგრაციასთან დაკავშირებით აკეთებენ კატასტროფაა. თუ პარიზს შეხედავთ, დაინახავთ, რომ ეს სრულიად სხვა ადგილია. მე პარიზი მიყვარდა. თუ ლონდონს შეხედავთ, მათ მერი ჰყავთ, სახელად ხანი. საშინელი მერია. ლონდონი სხვა ადგილია", - განაცხადა ტრამპმა.
