გამოცემა Politico წერს, აშშ-ის სპეციალურ წარმომადგენლებსა და პუტინს შორის მოლაპარაკებები უშედეგოდ დასრულდა. შეხვედრა დაახლოებით 5 საათს გაგრძელდა, თუმცა რუსეთის მიერ უკრაინის წინააღმდეგ ომის დასრულების შესახებ შეთანხმებას ვერ მიაღწიეს.
უკრაინაში ომის დასრულების მოლაპარაკებებში ვლადიმირ პუტინმა გამოიყენა ხიბლის, ჭკვიანური ხრიკებისა და პირდაპირი მუქარის კომბინაცია, რათა რუსეთის ზუსტი პოზიცია ამერიკელი მომლაპარაკებლების - სტივ უიტკოფისთვის და ჯარედ კუშნერისთვის გადაეცა.
როგორც Politico წერს, აშშ-ის პრეზიდენტ დონალდ ტრამპის სპეციალური წარმომადგენელი, უიტკოფი და ტრამპის სიძე ჯარედ კუშნერი, გუშინ მოსკოვში სეირნობდნენ და ძვირადღირებულ რესტორანში ვახშმობდნენ, ვიდრე პუტინი მათ კრემლში უკრაინის შესახებ სამშვიდობო შეთანხმების განსახილველად შეხვედრას ელოდებოდა.
„ვიდრე ამერიკელები დროს კლავდნენ, პუტინმა საინვესტიციო ფორუმზე მედიას მიმართა, სადაც ევროპა სამშვიდობო პროცესის ჩაშლაში დაადანაშაულა და მომავალ ესკალაციაზე მიანიშნა“, - აღნიშნავს გამოცემა.
ჟურნალისტებმა აღნიშნეს, რომ პუტინსა და ამერიკელ მომლაპარაკებლებს შორის შეხვედრა საბოლოოდ დაგეგმილზე სამი საათით გვიან დაიწყო.
უკრაინის სამშვიდობო შეთანხმების განხილვა ხუთ საათს გაგრძელდა და ადგილობრივი დროით შუაღამის შემდეგ დასრულდა.
პუტინის თანაშემწემ იური უშაკოვმა, რომელიც ასევე იმყოფებოდა შეხვედრაზე, საუბარს „სასარგებლო, კონსტრუქციული და ძალიან ინფორმაციული“ უწოდა, თუმცა დასძინა, რომ „ჯერ კიდევ ბევრი სამუშაოა“ გასაკეთებელი.
„ჩვენ ნამდვილად არ ვართ შორს მშვიდობისგან“, - თქვა მან.
გამოცემამ ხაზგასმით აღნიშნა, რომ უშაკოვის თქმით, პუტინმა „ევროპული მხარის დესტრუქციულ ქმედებებს“ გაუსვა ხაზი, რაც მის მცდელობაზე მიუთითებს, სამშვიდობო შეთანხმების მიღწევის ნებისმიერი წარუმატებლობისთვის პასუხისმგებლობა ევროკავშირს დააკისროს, რომელიც შეხვედრას არც კი ესწრებოდა.
გამოცემამ აღნიშნა, რომ ტრამპის „სამშვიდობო გეგმა“ უკრაინისგან დონბასსა და ნატო-ში წევრობაზე უარის თქმას ითვალისწინებს. თუმცა, ნაკლებად ნათელია, თუ რას მოითხოვს ტრამპი რუსეთისგან და რა დათმობებზეა მზად მოსკოვი.
აღნიშნულია, რომ მოსკოვის მოლაპარაკებების წინა დღესაც კი პუტინს არ გამოუჩენია უკრაინის ფაქტობრივი კაპიტულაციის მოთხოვნიდან უკან დახევის ნიშნები.
„სინამდვილეში, არც სტამბოლში წინა მოლაპარაკებებმა, არც ტრამპსა და პუტინს შორის აგვისტოში ალასკაში გამართულმა სამიტმა და არც უიტკოფის მოსკოვში წინა ხუთმა ვიზიტმა არ გამოიწვია კრემლის პოზიციის შერბილება“, - აღნიშნავს გამოცემა.
ჟურნალისტებმა ასევე აღნიშნეს, რომ ჯერ არ არსებობს ნიშნები იმისა, რომ შემდეგი მოლაპარაკებები მოსკოვის პოზიციის შეცვლას გამოიწვევს.
