რუსეთი, სავარაუდოდ, უარყოფს აშშ-ის მიერ შეთავაზებული სამშვიდობო გეგმის ნებისმიერ ვერსიას, რადგან მას უკრაინასა და გლობალურად საკუთარი მიზნების მიღწევის დაბრკოლებად მიიჩნევს.
შესაბამის დასკვნამდე ამერიკის ომის შემსწავლელი ინსტიტუტის [ISW] ანალიტიკოსები კრემლიდან მომდინარე ინფორმაციების ანალიზის შემდეგ მივიდნენ.
ერთ-ერთმა რუსმა სამხედრო ბლოგერმა 30 ნოემბერს განაცხადა, რომ რუსეთის ლიდერმა ვლადიმირ პუტინმა „ნათლად“ მიანიშნა რუსეთის სამხედრო მიზნების სამხედრო საშუალებებით მიღწევის მზაობაზე; შესაბამისად, 2022 წელს სტამბოლის მოლაპარაკებების შემდეგ ნებისმიერი სამშვიდობო მოლაპარაკებები „მიუღებელია“.
მან ასევე დასძინა, რომ რუსეთის მონაწილეობა ნებისმიერ სამშვიდობო მოლაპარაკებებში დამოკიდებულია რუსეთის პროგრესზე ბრძოლის ველზე.
მან ასევე განაცხადა, რომ აშშ-ის პრეზიდენტ დონალდ ტრამპის ძალისხმევას ფრონტის ხაზზე ცეცხლის შეწყვეტის მიღწევის მიმართულებით რუსეთისთვის არანაირ სარგებელს არ მოაქვს, რადგან ცეცხლის შეწყვეტა რუსეთს აიძულებს, გააუქმოს 2022 წლის სექტემბრის მობილიზაციის ბრძანებულება, რომელიც შეამცირებს რუსეთის შეიარაღებული ძალების რაოდენობას და რუს ოფიცერთა კორპუსს.
ანალიტიკოსები აღნიშნავენ, რომ რუსეთი განზრახ თავს არიდებს მოლაპარაკებების შესახებ საჯარო განცხადებებს.
ISW-ის ცნობით, კრემლის ოფიციალური პირები მუდმივად უარყოფენ როგორც 28-პუნქტიან სამშვიდობო გეგმას, ასევე მის ადაპტირებულ ვერსიებს, რადგან ისინი არ ითვალისწინებენ რუსეთის „მაქსიმალისტურ სამხედრო მოთხოვნებს“.
„რუსი ოფიციალური პირები და ულტრანაციონალისტები 2025 წლის ნოემბრის შუა რიცხვებში მისი პირველი გაჟღერების შემდეგ მუდმივად საჯაროდ უარყოფდნენ 28-პუნქტიან სამშვიდობო გეგმას და მის შემდგომ ვერსიებს, რადგან შეთავაზებული გეგმა არ ითვალისწინებს რუსეთის ყველა აბსოლუტურ სამხედრო მოთხოვნას“, - ხაზს უსვამს ISW.
