საბერძნეთში საპროტეტსო აქციებზე ბერძენ ფერმერებსა და პოლიციას შორის შეტაკება მოხდა. აქციას ფერმერები ევროკავშირის სუბსიდიების დაგვიანების გამო მართავდნენ. იუწყება Reuters.
ასობით ფერმერი ქუჩაში გამოვიდა და რამდენიმე რაიონში ტრაქტორებით გზები გადაკეტა. ისინი აპროტესტებდნენ ევროკავშირის დახმარებისა და სხვა გადახდების დეფიციტს, რომელიც ჯამში დაახლოებით 600 მილიონ ევროს შეადგენს.
ქალაქ ნიკეას ცენტრში, პოლიციამ ცრემლსადენი გაზი გამოიყენა მომიტინგეების წინააღმდეგ, რომლებიც პოლიციის კორდონის გარღვევას ცდილობდნენ.
გადახდების შეფერხება გამოძიების ფონზე მოხდა, რომლის თანახმად, ზოგიერთმა ფერმერმა გააყალბა მიწისა და პირუტყვის საკუთრების მონაცემები ევროკავშირის სასოფლო-სამეურნეო სუბსიდიების მისაღებად.
მიმდინარე წელს ევროპის პროკურატურამ განაცხადა, რომ აღმოაჩინა მტკიცებულებები, რომ ბერძენმა ფერმერებმა, ოფიციალური პირების დახმარებით, მიითვისეს ევროკავშირის თანხები.
საბერძნეთის ხელისუფლებამ ცალკე გამოძიება დაიწყო, ხოლო პარლამენტი სახელმწიფო სააგენტო OPEKEPE-ს აუდიტს ატარებს, რომელიც ყოველწლიურად ასობით ათასი ფერმერისთვის ევროკავშირის დახმარების სახით დაახლოებით 2.5 მილიარდ ევროს ანაწილებს.
მთავრობამ აღიარა, რომ ევროკავშირის სუბსიდიების პირველი ტრანში გასულ წელთან შედარებით უფრო მცირეა და რომ 40 000-ზე მეტი ფერმერის განაცხადი განიხილება.
ივნისში ევროკავშირმა საბერძნეთს 392 მილიონი ევროს ოდენობის ჯარიმა დააკისრა 2016-2023 წლებში OPEKEPE-ს მიერ სოფლის მეურნეობის სუბსიდიების ბოროტად გამოყენებისთვის.
