აშშ-ის ფლორიდის შტატში უკრაინისა და აშშ-ის დელეგაციებს შორის რუსეთ-უკრაინის ომის დასრულებასთან დაკავშირებით მოლაპარაკებები დაიწყო.
ამის შესახებ უკრაინის ეროვნული უსაფრთხოებისა და თავდაცვის საბჭოს მდივნი რუსტემ უმეროვი სოციალურ ქსელში წერს.
„მე მუდმივ კომუნიკაციაში ვარ უკრაინის პრეზიდენტთან. ჩვენ გვაქვს მკაფიო დირექტივები და პრიორიტეტები - უკრაინის ინტერესების დაცვა, არსებითი დიალოგი და წინსვლა ჟენევაში მიღწეული სამუშაოს საფუძველზე“, - წერს უმეროვი.
შეხვედრამდე აშშ-ის სახელმწიფო მდივანმა მარკო რუბიომ განაცხადა, რომ შეერთებული შტატები ომის დასრულებას ცდილობს, რათა მომავალში „ასეთი ომი აღარ მოხდეს და უკრაინამ უზრუნველყოს კეთილდღეობა მთელი თავისი მოსახლეობისთვის“.
უკრაინის დელეგაციის ხელმძღვანელმა, რუსტემ უმეროვმა, აშშ-ის პრეზიდენტ დონალდ ტრამპს სამშვიდობო ინიციატივებისთვის მადლობა გადაუხადა.
„ბოლო 10 თვის განმავლობაში ჩვენ მნიშვნელოვან პროგრესს მივაღწიეთ და მნიშვნელოვანი მხარდაჭერა მივიღეთ. ახლა ჩვენ უკრაინის მომავალსა და უსაფრთხოებას განვიხილავთ, რათა თავიდან ავიცილოთ უკრაინის წინააღმდეგ აგრესიის განმეორება“, - განაცხადა უმეროვმა.
დელეგაციის შემადგენლობაში ასევე შედიან პრეზიდენტის მრჩეველი ალექსანდრ ბევზი, საგარეო დაზვერვის სამსახურის უფროსი ოლეჰ ივაშჩენკო, საგარეო საქმეთა მინისტრის პირველი მოადგილე სერჰიი კისლიცია, ეროვნული უსაფრთხოებისა და თავდაცვის საბჭოს მდივნის პირველი მოადგილე ევგენი ოსტრიანსკი და თავდაცვის სამინისტროს მთავარი დაზვერვის სამმართველოს უფროსის მოადგილე ვადიმ სკიბიცკი.
აშშ-ს წარმოადგენს დონალდ ტრამპის წარმომადგენელი სტივ უიტკოფი, სახელმწიფო მდივანი მარკო რუბიო. ტრამპის სიძე ჯარედ კუშნერი.
