უკრაინის პრეზიდენტმა ვოლოდიმირ ზელენსკიმ ხაზგასმით აღნიშნა, რომ უკრაინა ყურადღებით მუშაობს „სამშვიდობო გეგმის“ ყველა პუნქტზე, რათა თავიდან აიცილოს ომის განმეორება, რადგან რუსეთი ცდილობს შეინარჩუნოს შესაძლებლობა „კიდევ უფრო დიდხანს იბრძოლოს და არა მხოლოდ უკრაინის წინააღმდეგ“. ამის შესახებ ზელენსკი სოციალურ ქსელში წერს.
„ახლა რუსი მეთაურები უკრაინულ პოზიციებზე თავდასხმებს ახორციელებენ იმ ადამიანების წინააღმდეგ, რომლებიც ჯერ კიდევ დაწყებით სკოლაში სწავლობდნენ 2014 წელს, როდესაც ყირიმი ოკუპირებული იქნა და უკრაინის წინააღმდეგ ჰიბრიდული აგრესია დაიწყო.
ეს ხანგრძლივი ომია და მთავარი, რასაც რუსეთი ცდილობს, არის ის, რომ საკუთარ თავს კიდევ უფრო დიდხანს ბრძოლის შესაძლებლობა მისცეს და არა მხოლოდ უკრაინის წინააღმდეგ. სწორედ ამიტომ ვაფასებთ, რომ ამდენი ძალა და ლიდერი ახლა მშვიდობისთვის მუშაობს.
უკრაინა მადლიერია შეერთებული შტატების, ყველა ამერიკელის გულის და პირადად პრეზიდენტ ტრამპის დახმარებისთვის, რომელიც, „ჯაველინებით“ დაწყებული, უკრაინელების სიცოცხლეს იხსნის. მადლობას ვუხდით ევროპაში, G7-სა და G20-ში ყველას, ვინც გვეხმარება სიცოცხლის დაცვაში. მნიშვნელოვანია, რომ ეს მხარდაჭერა შევინარჩუნოთ,“ - წერს ზელენსკი.
პრეზიდენტის თქმით, „მთელი დიპლომატიური სიტუაციის სირთულე იმაში მდგომარეობს, რომ ეს ომი რუსეთმა დაიწყო - და მხოლოდ რუსეთმა, და მთელი სრულმასშტაბიანი ომის განმავლობაში, მხოლოდ რუსეთს არ სურს ომის დასრულება“.
„მნიშვნელოვანია, არ დაგვავიწყდეს მთავარი მიზანი: რუსეთის ომის შეჩერება და მისი ხელახლა გაჩაღების თავიდან აცილება. ამისთვის კი მსოფლიო ღირსეუი უნდა იყოს - აღნიშნა ზელენსკიმ.
„მხოლოდ წელს პუტინმა უკვე ასობით ათასი თავისი ადამიანი გაწირა სიკვდილისთვის, რათა უკრაინის ტერიტორიის ერთი პროცენტი ან მეტი დაეკავებინა. და ამას აკეთებს რუსეთი, რომელსაც ისედაც უფრო მეტი საკუთარი საერთაშორისოდ აღიარებული ტერიტორია აქვს, ვიდრე მსოფლიოს ნებისმიერ სხვა ქვეყანას.
ომის ასეთი ხასიათი და რუსეთის მიერ მისი გახანგრძლივების მცდელობები აჩვენებს, რომ მათთვის საქმე არ ეხება ტერიტორიას, არ ეხება იმას, თუ როგორ იქცევა რუსეთის ესა თუ ის მეზობელი, არამედ რუსეთის „ომის უფლებას“, სხვების „დამორჩილების უფლებას“, უსაფრთხოების ფუნდამენტურ ნაკლებობას. სწორედ ამიტომ ვმუშაობთ ასე ფრთხილად ყველა საკითხზე, მშვიდობისკენ გადადგმულ ყველა ნაბიჯზე. ყველაფერი სწორად უნდა წარიმართოს - რათა ეს ომი ნამდვილად დასრულდეს და ომი აღარასდროს განმეორდეს,“ - წერს ზელენსკი.
