საქართველოს ყოფილი პრეზიდენტი მიხეილ სააკავშვილი უკრაინის პრეზიდენტს, ვოლოდიმირ ზელენსკის მიმართავს და სთხოვს, ომის სამოქალაქო ტყვეების სიაში ჩასვას. სააკაშვილის შესაბამისი მიმართვა მის ოფიციალურ ფეისბუქგვერდზე გამოქვეყნდა.
„ვცდილობ, ჩემი კითხვებით არ შეგაწუხოთ, რადგან ისედაც ბევრი სამუშაო გაქვთ. მადლობელი ვარ თქვენი მხარდაჭერისთვის და იმისთვის, რომ ვგრძნობ უკრაინის საგარეო საქმეთა სამინისტროს, უმაღლესი რადას, თქვენი ადმინისტრაციისა და ადამიანის უფლებათა კომისრის მხრიდან მუდმივ ყურადღებას. მაგრამ ახლა იძულებული ვარ, მოგმართოთ, რადგან გუშინ ციხის საავადმყოფოდან, სადაც მძიმე მოწამვლის გამო ვმკურნალობდი, ისევ ციხეში გადამიყვანეს – იმავე პერსონალთან, ვინც მომწამლა. 2022 წლის მარტში ჩემი მოწამვლა სრულმასშტაბიანი ომის დაწყების შემდეგ მოხდა. ჩემი მოწამვლა ამერიკულმა და გერმანულმა ლაბორატორიებმა დაადასტურეს. თავიდანვე პუტინი ჩემ მიმართ ანგარიშსწორებას ითხოვდა, მედვედევი და ლავროვი კი არაერთხელ ტრაბახობდნენ ჩემი პატიმრობით.
თავდაპირველად დამაკავეს სრულიად გამოგონილ საქმეზე და საქართველოს მაშინდელმა პრემიერ-მინისტრმა ღიად განაცხადა, რომ ეს საქმე უკრაინაში ჩემს საქმიანობას უკავშირდებოდა. ჩემ წინააღმდეგ ახლახან აღძრულ ახალ სისხლის სამართლის საქმეში, სხვებთან ერთად, მე ბრალი მედება მტრულ უცხო სახელმწიფოს სასარგებლოდ დივერსიაში. საქმის მასალებში მოცემულია თქვენი, ასევე მიხეილ პოდოლიაკის განცხადებები. ანუ არალეგიტიმური საქართველოს ხელისუფლება ღიად აცხადებს უკრაინას მტრულად განწყობილ უცხო სახელმწიფოდ. და ეს გასაკვირი არ არის, რადგან ამ დიდი ომის დასაწყისიდანვე რუსი ოლიგარქი ივანიშვილი და მისი ლაქიები ღიად მიემხრნენ რუსეთს.
ამ კონტექსტში აბსოლუტურად ნათელია, რომ ჩემი დევნა და ჩემი ბედი ომს უკავშირდება. მე ვარ უკრაინის მოქალაქე და ეროვნული რეფორმების საბჭოს აღმასრულებელი კომიტეტის თავმჯდომარე, სადაც მქონდა პატივი, მემუშავა თქვენი ხელმძღვანელობით. მინდა, გთხოვოთ, ისევე როგორც 2019 წელს, როდესაც დამიბრუნეთ უკანონოდ ჩამორთმეული მოქალაქეობა – როგორც ოდესის ოლქის სახელმწიფო ადმინისტრაციის ყოფილი ხელმძღვანელი და ეროვნული რეფორმების საბჭოს აღმასრულებელი კომიტეტის თავმჯდომარე, რომელიც უკანონოდ არის დაკავებული საქართველოს პრორუსული რეჟიმის მიერ, ამ ომის სამოქალაქო ტყვეების სიაში შემიყვანოთ შესაბამისი სამართლებრივი შედეგებით.
მე ვიცი, რომ უკრაინელები თავიანთ ხალხს არ ტოვებენ და თქვენი იმედი მაქვს“, – წერს მიხეილ სააკაშვილი.
