13 ნოემბრის ღამეს, უკრაინის თავდაცვის ძალებმა დრონებისა და „ფლამინგოს“, „ბარსის“ და „ლიუტის“ ტიპის რაკეტების გამოყენებით რუსეთსა და უკრაინის დროებით ოკუპირებულ ტერიტორიებზე რამდენიმე ათეული სამიზნე დაბომბეს.
ინფორმაციას უკრაინის შეიარაღებული ძალების გენშტაბი ავრცელებს.
„აგრესორის სამხედრო, ეკონომიკური და შეტევითი პოტენციალის შემცირების ფარგლებში, 13 ნოემბრის ღამეს, უკრაინის თავდაცვის ძალების დანაყოფებმა დარტყმები განახორციელეს რუსეთის ფედერაციის ტერიტორიაზე და უკრაინის დროებით ოკუპირებულ ტერიტორიებზე რამდენიმე ათეულ სამიზნეზე,“ - აღნიშნულია განცხადებაში.
როგორც იუწყებიან, ყირიმში დაბომბეს ნავთობის საწყობი, ვერტმფრენების სადგომი და უპილოტო საფრენი აპარატების შესანახი და მომზადების ადგილები აეროდრომ „კიროვსკოზე“, ასევე ქალაქ ევპატორიასთან ახლოს მდებარე რადიოლოკაციური სადგური.
სამხედრო ოფიციალური პირების ცნობით, ზაპოროჟიეს ოლქის დროებით ოკუპირებულ ტერიტორიაზე დაზიანდა ბერდიანსკის მახლობლად ნავთობის საწყობი და რუსი ოკუპანტების მე-5 კომბინირებული შეიარაღებული არმიის და 127-ე მოტორიზებული მსროლელთა დივიზიის სამეთაურო პუნქტები.
ასევე დაზიანდა რუსეთის ტერიტორიაზე არსებული ობიექტები. ზარალის ოდენობა დგინდება.
აღნიშნულია, რომ უკრაინელებმა კომპლექსური დარტყმების განსახორციელებლად გამოიყენეს თავდასხმის უპილოტო საფრენი აპარატები, რეაქტიული დრონები და სხვადასხვა ტიპის რაკეტები, მათ შორის უკრაინული წარმოების „ფლამინგოს“, „ბარსის“ და „ლიუტის“ ტიპის რაკეტები.
