რუსულმა კომპანია „ლუკოილმა“ ერაყში, გიგანტურ ნავთობსაბადო West Qurna-2 -ზე ფორსმაჟორული მდგომარეობა გამოაცხადა. იუწყება Reuters.

საკითხთან დაკავშირებულმა ოთხმა წყარომ სააგენტოს განუცხადა, რომ ეს მოხდა „მას შემდეგ, რაც რუსული ნავთობკომპანიის წინააღმდეგ დასავლეთის სანქციებმა კომპანიების საქმიანობა გაართულა“.

სააგენტოს წყაროების ცნობით, ერაყმა კომპანიისთვის ყველა გადახდა შეწყვიტა.

„გასულ სამშაბათს, „ლუკოილმა“ ერაყის ნავთობის სამინისტროს წერილი გაუგზავნა, რომელშიც ნათქვამია, რომ არსებობს ფორსმაჟორული გარემოებები, რომლებიც ხელს უშლის West Qurna-2 -ის საბადოზე ნორმალური მუშაობის გაგრძელებას“, - წერს გამოცემა.

„თუ ფორს-მაჟორის მიზეზები ექვსი თვის განმავლობაში არ მოგვარდება, „ლუკოილი“ წარმოებას შეაჩერებს და მთლიანად დატოვებს პროექტს“, - განაცხადა ერაყის ნავთობის მრეწველობის მაღალჩინოსანმა“, - წერს Reuters.

გასულ კვირას, Reuters-ის ცნობით, ერაყის სახელმწიფო ნავთობკომპანია SOMO-მ სანქციების გამო გააუქმა „ლუკოილის“ საბადოზე წარმოებული ნედლი ნავთობის სამი ტვირთის ჩატვირთვა.

მსოფლიოში ერთ-ერთი უდიდესი ნავთობის საბადო, West Qurna-2 ლუკოილის ყველაზე ღირებული უცხოური აქტივია.

გამოცემა აღნიშნავს, რომ ის სამხრეთ პორტ ბასრადან 65 კილომეტრში ჩრდილო-დასავლეთით მდებარეობს.

საბადო ერაყის ნავთობის მთლიანი წარმოების დაახლოებით 9%-ს შეადგენს.