აშშ-ის სენატმა მიიღო დაფინანსების კომპრომისული გეგმა, რომელიც აშშ-ის მთავრობის ხელახლა გახსნის პირველ ნაბიჯს წარმოადგენს.
სენატმა დაამტკიცა კანონპროექტი, რომელიც მთავრობას საშუალებას მისცემს დაასრულოს აშშ-ის ისტორიაში ყველაზე ხანგრძლივი „შათუნდი“, რომელიც უკვე 40 დღეა გრძელდება.
CNN-ის ცნობით, 60-მა სენატორმა კანონპროექტს მხარი დაუჭირა, ხოლო 40-მა წინააღმდეგ მისცა ხმა..
კენჭისყრა მას შემდეგ გაიმართა, რაც სენატის რვა „დემოკრატმა“ წევრმა „რესპუბლიკური პარტიის“ ლიდერებთან და თეთრ სახლთან შეთანხმებას მიაღწია.
შეთანხმება მოიცავს დეპარტამენტების, მათ შორის სოფლის მეურნეობის დეპარტამენტის, სამ ყოვლისმომცველ დაფინანსების კანონპროექტს მომდევნო ფისკალური წლის ბოლომდე, ასევე დადგენილებას, რომ დარჩენილი დეპარტამენტების დაფინანსება არსებულ დონეზე 30 იანვრამდე გაგრძელდეს.
მთავრობის დახურვასთან დაკავშირებულ უთანხმოებაში „დემოკრატებისთვის“ მთავარი დაბრკოლება მილიონობით ამერიკელისთვის ჯანდაცვის შეღავათების გახანგრძლივების უზრუნველყოფა იყო.
მოლაპარაკებული შეთანხმების ფარგლებში, სენატის უმრავლესობის ლიდერი, ჯონ ტუნი „დემოკრატებს“ დაჰპირდა, რომ დეკემბრის მეორე კვირამდე ჯანდაცვის აღნიშნული შეღავათების გახანგრძლივების საკითხზე კენჭისყრას ჩაატარებს.
თუ სენატი საბოლოოდ მიიღებს კანონპროექტს შესწორებებით, პაკეტი უნდა დაამტკიცოს წარმომადგენელთა პალატამ და ხელმოსაწერად გაუგზავნოს პრეზიდენტ დონალდ ტრამპს. ამ პროცესს შესაძლოა, რამდენიმე დღე დასჭირდეს.
თავის მხრივ, ტრამპმა განაცხადა, რომ „შათდაუნი“ დასასრულს უახლოვდებოდა.
„როგორც ჩანს, შათდაუნის“ დასასრულს ვუახლოვდებით. ამას ძალიან მალე გაიგებთ“, - განუცხადა მან ჟურნალისტებს.
