უკრაინის პრეზიდენტმა ვოლოდიმირ ზელენსკიმ განაცხადა, რომ არ სჯერა ბელარუსის პრეზიდენტის, ალექსანდრ ლუკაშენკას ბოლოდროინდელი მცდელობების, გამოხატოს თავისი თითქოსდა კეთილგანწყობა უკრაინელი ხალხის მიმართ, რადგან სწორედ მისი ქვეყნის ტერიტორიიდან დაესხა თავს რუსეთი უკრაინას 2022 წლის 24 თებერვლის დილას.
„არ უნდა დაგვავიწყდეს ლუკაშენკა, რადგან ის ახლა მედიაში ძალიან ენამჭევრი გახდა და აჩვენებს, თუ რამდენად კეთილია ჩვენი ხალხის მიმართ.
ჩვენ არ გვჭირდება მისი სიკეთე, რომელიც დილის ოთხ საათზე რაკეტებით მოვიდა ჩვენთან.
ყველაფერი ძალიან კარგად გვახსოვს და ის მაინც გადაიხდის იმისთვის, რაც ჩაიდინა, კერძოდ, იმისთვის, რომ თავისი ტერიტორიიდან ჩვენზე თავდასხმა დაუშვა. სრულმასშტაბიანი ომი ბელარუსის ტერიტორიიდან დაიწყო. ამას არავინ დაივიწყებს“, - განაცხადა ზელენსკიმ.
ზელენსკიმ ამის შესახებ იმ ფაქტის კონტექსტში ისაუბრა, რომ უკრაინა არასდროს დათანხმდება რუსეთთან სამშვიდობო მოლაპარაკებებს ბელარუსის ტერიტორიაზე, რადგან ეს ქვეყანა კრემლს აგრესიაში ეხმარება.
6 ნოემბერს ლუკაშენკამ მიანიშნა, რომ უკრაინელებს თანაუგრძნობს და მათ ბელარუსში სამუშაოდ ჩასვლა შესთავაზა.
„მობრძანდით, უკრაინელებო! სიამოვნებით გიმასპინძლებთ. თქვენს ოჯახებს და თქვენს შვილებს ბელარუსელების მსგავსად ცხოვრებას შევუქმნით... ისინი ძალიან შრომისმოყვარე ადამიანები არიან, რომლებსაც ჩვენი ესმით და ერთ ენაზე ვსაუბრობთ... თუმცა, ჩვენი მეზობლის სახლში პრობლემები დატრიალდა. ვფიქრობ, ამ პრობლემას მოვაგვარებთ“, - განაცხადა ლუკშენკამ.
