დონეცკის ოლქის ქალაქ პოკროვსკში უკრაინის თავდაცვის სამინისტროს მთავარი სადაზვერვო სამმართველოს მონაწილეობით გრძელდება სტაბილიზაციის ღონისძიებები. ამის შესახებ უკრაინული მედია წყაროზე დაყრდნობით იუწყება.
შაბათს, რუსეთის თავდაცვის სამინისტრომ განცხადება გაავრცელა, რომლის თანახმად, რუსმა ჯარისკაცებმა თითქოსდა ჩაშალეს უკრაინის სპეციალური ოპერაციების ძალების პოკროვსკში განლაგების მცდელობა და რომ 11-ვე სპეცრაზმელი, რომლებიც ტერიტორიაზე ვერტმფრენით დაეშვნენ, თითქოს დაიღუპა.
გამოცემის წყარო აღნიშნავს, რომ უკრაინული დესანტის განადგურების შესახებ განცხადება სიმართლეს არ შეესაბამება.
მისი თქმით, პოკროვსკის გარკვეულ რაიონში სტაბილიზაციის ოპერაციები გრძელდება უკრაინის მთავარი სადაზვერვო სამმართველოს უფროსის, კირილო ბუდანოვის ხელმძღვანელობით.
„ეს ინფორმაცია ისეთივე მცდარია, როგორც გერასიმოვის მიერ პუტინისთვის რამდენიმე დღის წინ გაკეთებული შეტყობინება პოკროვსკის ალყაში მოქცევის შესახებ,“ - განაცხადა წყარომ.
შეგახსენებთ, Reuters წყაროებზე დაყრდნობით, იტყობინება, რომ ამ კვირის დასაწყისში დონეცკის რეგიონის ქალაქ პოკროვსკში, საბრძოლო მოქმედებების ესკალაციის გამო ვითარების სტაბილიზაციის მიზნით, მთავარი სადაზვერვო სამმართველოს სპეციალური დანიშნულების რაზმები გაგზავნეს.
