ისრაელის თავდაცვის ძალების წარმომადგენელმა შაბათს განაცხადა, რომ ამ კვირაში „ჰამასის“ მიერ წითელი ჯვრისთვის გადაცემული სამი ადამიანის ცხედარი არცერთ მძევალს არ ეკუთვნის.

როგორც France 24 იუწყება, აღნიშნულმა ცნობამ, შესაძლოა, ძირი გამოუთხაროს აშშ-ს შუამავლობით ისრაელსა და ჰამასს შორის ომში მიღწეულ ცეცხლის შეწყვეტის შეთანხმებას.

მძევლების გადაცემა ისრაელის მიერ პარასკევს ღაზაში 30 პალესტინელის ცხედრის დაბრუნებას მოჰყვა.

სამი ადამიანის დაუდგენელი ნეშტი პარასკევს გვიან ღამით ისრაელში დააბრუნეს, სადაც მათ ღამით ექსპერტიზა ჩაუტარდათ.

ამის შემდეგ კიდევ ერთმა ისრაელელმა სამხედრომ განაცხადა, რომ ისრაელის დაზვერვის მონაცემებით, ისინი არ ეკუთვნოდნენ პალესტინელი მებრძოლების მიერ 2023 წლის 7 ოქტომბერს სამხრეთ ისრაელზე განხორციელებული თავდასხმის დროს აყვანილ არცერთ მძევალს.

მძევლების ცხედრების გადაცემა ისრაელისთვის აშშ-ს შუამავლობით მიღწეული ცეცხლის შეწყვეტის შეთანხმების პირობას წარმომადგენს.
ცეცხლის შეწყვეტის დაწყებიდან დაბრუნებული 17 ცხედრიდან 15 ისრაელის, ერთი ტაილანდის და ერთი ნეპალის მოქალაქეს ეკუთვნის.

10 ოქტომბრის ზავის ამოქმედებიდან ჰამასმა (აშშ-ში და ევროკავშირში ტერორისტულად შერაცხილი) დააბრუნა 20 გადარჩენილი მძევალი, რომლებიც ჯერ კიდევ ტყვეობაში იყვნენ და დაიწყო გარდაცვლილი მძევლების ცხედრების დაბრუნების პროცესი.

ისრაელი „ჰამასს“ ადანაშაულებს შეთანხმების დარღვევაში, რადგან ცხედრები საკმარისად სწრაფად არ დააბრუნა, თუმცა პალესტინური დაჯგუფება აცხადებს, რომ ღაზის ნანგრევებში დამარხული გვამების პოვნას დრო დასჭირდება.