ბრაზილიის ქალაქ რიო დე ჟანეიროში კლიმატის ცვლილების კონფერენციის წინ პოლიციის მასშტაბური ოპერაციის დროს სულ მცირე 132 ადამიანი დაიღუპა. Reuters-ის ცნობით, ეს ისტორიაში ნარკომოვაჭრეების ბანდების წინააღმდეგ ჩატარებული ყველაზე მასშტაბური ოპერაციაა.
კასტროს შტატის გუბერნატორის თქმით, ქალაქის საერთაშორისო აეროპორტის მახლობლად Comando Vermelho-ს ბანდების წინააღმდეგ ჩატარებულ რეიდებში 2500 პოლიციელი მონაწილეობდა. ნარკომაფიასთან დაკავშირებული 100-ზე მეტი ადამიანი დააკავეს.
რიო დე ჟანეიროში Comando Vermelho-ს ბანდის წინააღმდეგ ჩატარებული ყველაზე მასშტაბური პოლიციის ოპერაციის დროს, სულ მცირე 132 ადამიანი, მათ შორის რამდენიმე პოლიციელი დაიღუპა.
„ჩვენ მტკიცედ ვუპირისპირდებით ნარკოტერორიზმს“, - განაცხადა კასტრომ.
მისი თქმით, ოპერაცია საერთაშორისო აეროპორტის მახლობლად მდებარე ალემაოსა და პენას ფაველებში ჩატარდა. რიო-დე-ჟანეიროს ფაველები ღარიბი, მჭიდროდ დასახლებული ადგილებია.
ფაველებში პოლიციის რეიდები რიო დე ჟანეიროში გაერო-ს კლიმატის სამიტთან დაკავშირებული საერთაშორისო ღონისძიებების დაწყებამდე რამდენიმე დღით ადრე ჩატარდა.
სამშაბათს დილით ფაველებში დაახლოებით 2500 პოლიციელი შევიდა, რის შემდეგაც შეტაკებები მალევე დაიწყო. Comando Vermelho -ს ბანდებმა პოლიციელების წინააღმდეგ ცეცხლსასროლი იარაღი გამოიყენეს და ბარიკადები აღმართეს, რომლებსაც ცეცხლი წაუკიდეს.
ადგილობრივი მოსახლეობის თქმით, ბარიკადების ასაგებად ავტობუსებს და მსუბუქი ავტომობილებს იყენებდნენ.
ოპერაციის დროს ამოღებულია 200 კილოგრამზე მეტი ნარკოტიკი და ათობით ერთეული იარაღი.
როგორც იუწყებიან, ოთხშაბათს დილით ადრე, ამ ადგილების მაცხოვრებლებმა ადგილობრივ მოედანზე სულ მცირე 70 ადამიანის ცხედარი დაასვენეს. მათი თქმით, ეს ადამიანები მშვიდობიანი მოქალაქეები იყვნენ და არა ბანდის წევრები, თუმცა ამის შესახებ დადასტურებული ინფორმაცია ჯერ არ არსებობს.
გაეროს ადამიანის უფლებათა ოფისმა განაცხადა, რომ შეძრწუნებულია ბრაზილიის პოლიციის ქმედებებით და მოუწოდა სწრაფი და ეფექტური გამოძიებისკენ.
შემდეგ კვირას რიო უმასპინძლებს C40-ის გლობალური მერების სამიტს კლიმატის ცვლილებასთან დაკავშირებულ საკითხებზე, ასევე პრინც უილიამის Earthshot Prize-ის ცერემონიას, რომელშიც მონაწილეობას მიიღებენ ისეთი ცნობილი სახეები, როგორებიც არიან პოპ-ვარსკვლავი კაილი მინოუგი და ფორმულა 1-ის ოთხგზის მსოფლიო ჩემპიონი სებასტიან ფეტელი.
გაერო-ს კლიმატის სამიტი ქალაქ ბელენში 10-21 ნოემბერს გაიმართება.
