ნატო-ს გენერალური მდივნის, მარკ რუტეს განცხადებით, ვლადიმირ პუტინს უმთავრდება ფული, ჯარისკაცები და იდეები. ამის შესახებ რუტემ ლონდონში, უკრაინის მხარდამჭერი კოალიციის წევრი ქვეყნების ლიდერებისა და უკრაინის პრეზიდენტის შეხვედრის შემდეგ გამართულ პრესკონფერენციაზე განაცხადა.
"უკრაინაში, ბრძოლის ველზე პუტინის პროგრესი მცირეა. ის უმნიშვნელო გამარჯვებისთვის დიდ ფასს იხდის - ასიათასობით რუსი იღუპება პუტინის მოჩვენებითი აგრესიით. უკრაინა აგრძელებს თავის დაცვას და ჩვენი მათდამი დახმარება მუშაობს. სიმართლე არის ის, რომ პუტინს უმთარდება ფული, ჯარისკაცები და იდეები", - განაცხადა რუტემ. მისი თქმით, ახლა კრემლზე ზეწოლის გაზრდის დროა.
ამასთან, ნატო-ს გენერალურმა მდივანმა უპასუხა ჟურნალისტის კითხვას, რომელიც აშშ-ის მხრიდან უკრაინისთვის Tomahawk-ის ტიპის შორ მანძილზე მოქმედი რაკეტების გადაცემის შესაძლებლობას ეხებოდა და აღნიშნა, რომ ალიანსის ყველა წევრი დამოუკიდებლად იღებს გადაწყვეტილებას, რომელი იარაღი უნდა მიაწოდოს კიევს.
მისი თქმით, შეერთებული შტატები კვლავ განიხილავს უკრაინისთვის შორი მოქმედების Tomahawk-ის რაკეტების მიწოდების შესაძლებლობას.
ნატო-ს გენერალურმა მდივანმა ხაზგასმით აღნიშნა, რომ უკრაინას აქვს თავდაცვის უფლება, რაც, კერძოდ, მოიცავს რუსეთში მდებარე სამიზნეების წინააღმდეგ შორ მანძილზე მოქმედი იარაღის გამოყენებას. მან განაცხადა, რომ შეერთებული შტატები უკრაინელებს „ფართო სპექტრის იარაღით“ ამარაგებს.
გენერალურმა მდივანმა ასევე აღნიშნა, რომ ნატო მუშაობს იარაღის ნაკადის შესანარჩუნებლად,Tomahawk-ის საკითხი კი განხილვის პროცესშია.
