დანიის პრემიერ-მინისტრმა მეტე ფრედერიკსენმა განაცხადა, რომ ქვეყანა ისტორიაში პირველად შეიძენს შორ მანძილზე მოქმედ მაღალი სიზუსტის იარაღს და აღნიშნა, რომ აუცილებელია რუსეთის მხრიდან მომდინარე საფრთხის შეკავება, რომელიც წლების განმავლობაში შენარჩუნდება.
„ასეთი იარაღით თავდაცვის ძალებს შეეძლებათ სამიზნეებზე შორ მანძილზე თავდასხმა და, მაგალითად, მტრის რაკეტების საფრთხის ნეიტრალიზება“, - განაცხადა ფრედერიკსენმა პრესკონფერენციაზე.
დანიის თავდაცვის სამინისტრომ განაცხადა, რომ ამჟამად ისინი სწავლობენ, თუ რომელი იარაღის შეძენაა საჭირო.
მოგვიანებით, კოპენჰაგენში რუსეთის ელჩმა, ვლადიმირ ბარბინმა, სოციალურ ქსელებსა და სხვადასხვა მედიასაშუალებასთან კომენტარებში, ასეთი იარაღით შეიარაღების დასაბუთებას „აშკარა სიგიჟე“ უწოდა.
„მსოფლიოში არავის, არსად, არასდროს უფიქრია ბირთვულ სახელმწიფოს საჯაროდ დამუქრებოდა. ეს განცხადებები, უდავოდ, გათვალისწინებული იქნება. ამიერიდან მოგვიწევს ვივარაუდოთ, რომ დანია არა მხოლოდ რუსეთთან პირდაპირი სამხედრო შეტაკების შესაძლებლობაზე ფიქრობს, არამედ ასეთი სცენარისთვისაც ემზადება“, - აცხადებს ელჩი.
მეტე ფრედერიკსენმა, თავის მხრივ, უკვე გააკეთა კომენტარი ბარბინის განცხადებაზე.
„რუსეთი ცდილობს დაემუქროს ევროპასა და ნატო-ს, რათა ხელი შეგვიშალოს ჩვენი ხალხისა და საზღვრების დაცვაში. რა თქმა უნდა, ჩვენ არ დავუშვებთ, რომ შეგვაშინონ“, - განუცხადა მან ტელერადიოკომპანია DR-ს.
