უკრაინის პრეზიდენტმა ვოლოდიმირ ზელენსკიმ მოუწოდა აშშ-ის პრეზიდენტ დონალდ ტრამპს, მკაფიო პოზიცია დაიკავოს რუსეთის წინააღმდეგ სანქციებთან და უკრაინის უსაფრთხოების გარანტიებთან დაკავშირებით, რათა შეაჩეროს ვლადიმირ პუტინი და დაასრულოს ომი.
ამის შესახებ ზელენსკიმ Sky News-თან ინტერვიუში ისაუბრა.
„მე მჯერა, რომ დონალდ ტრამპს შეუძლია მოგვაწოდოს საკმარისი საჰაერო თავდაცვის სისტემები და შეერთებულ შტატებს საკმარისი რაოდენობის ასეთი სისტემები აქვს. დარწმუნებული ვარ, რომ აშშ-ს შეუძლია საკმარისი სანქციების გამოყენება რუსეთის ეკონომიკისთვის ზიანის მისაყენებლად და დონალდ ტრამპი საკმარისად ძლიერია იმისთვის, რომ პუტინს მისი ეშინოდეს,“ - განაცხადა ზელენსკიმ.
მისი თქმით, საბრძოლო მოქმედებების შეჩერების ერთადერთი გზა, პირველ რიგში, უსაფრთხოების მკაფიო გარანტიების უზრუნველყოფაა, რაც მხოლოდ იმ შემთხვევაში მოხდება, თუ ტრამპი გამბედაობას გამოიჩენს.
ზელენსკიმ ასევე იმედი გამოთქვა, რომ დიდი ბრიტანეთის პრემიერ-მინისტრი კირ სტარმერი ამ კვირაში სახელმწიფო ვიზიტის დროს ტრამპთან დეტალურად განიხილავს უკრაინის მომავლის უზრუნველყოფის საკითხს.
„ვიდრე ომს დავასრულებთ, მე ნამდვილად მინდა, რომ ყველა შეთანხმება დაიდოს. მინდა... გვქონდეს დოკუმენტი, რომელსაც შეერთებული შტატები და ყველა ევროპელი პარტნიორი დაუჭერს მხარს. ეს ძალიან მნიშვნელოვანია. ამისათვის პრეზიდენტ ტრამპის მკაფიო პოზიცია გვჭირდება“, - განაცხადა ზელენსკიმ.
