7 სექტემბრის ღამეს რუსეთმა უკრაინას კიდევ ერთი მასშტაბური დარტყმა მიაყენა. ცეცხლის ქვეშ მოექცა არაერთი ქალაქი, მათ შორის კიევი, ოდესა, დნიპრო, კრივი რიჰი.
ქვეყნის პრემიერ-მინისტრმა იულია სვირიდენკომ განაცხადა, რომ თავდასხმის შედეგად, სრულმასშტაბიანი ომის დაწყებიდან, პირველად დაზიანდა მთავრობის შენობა.
მისი თქმით, მსოფლიომ ამ თავდასხმებს არა მხოლოდ სიტყვებით, არამედ ქმედებებითაც უნდა უპასუხოს. აუცილებელია სანქციების გამკაცრება - პირველ რიგში, რუსული ნავთობისა და გაზის წინააღმდეგ.
„ამ ღამეს რუსეთმა უკრაინას კიდევ ერთი მასშტაბური დარტყმა მიაყენა. კიევი, კრივი რიჰი, დნიპრო, კრემენჩუგი და ოდესა ცეცხლის ქვეშ მოექცნენ.
პირველად მტრის თავდასხმის შედეგად დაზიანდა მთავრობის შენობა, სახურავი და ზედა სართულები. მაშველები ხანძარს აქრობენ. მადლობა მათ გაწეული სამუშაოსთვის.
შენობებს აღვადგენთ. მაგრამ დაკარგულ სიცოცხლეს ვერ დავიბრუნებთ. მტერი ყოველდღიურად ატერორებს და კლავს ჩვენს ხალხს მთელი ქვეყნის მასშტაბით.
მსოფლიომ ამ ნგრევებს არა მხოლოდ სიტყვებით, არამედ ქმედებებითაც უნდა უპასუხოს. აუცილებელია სანქციების გამკაცრება - პირველ რიგში, რუსული ნავთობისა და გაზის წინააღმდეგ. საჭიროა ახალი შეზღუდვები, რომლებიც კრემლის ომის მანქანას დაარტყამს.
და რაც მთავარია, უკრაინას იარაღი სჭირდება. ეს შეაჩერებს ტერორს და ხელს შეუშლის რუსეთს ყოველდღიურად უკრაინელების მკვლელობაში“, - წერს სვირიდენკო.
ცნობისათვის, გასულ ღამეს, კიევზე რუსული დრონებით თავდასხმის შედეგად 3 ადამიანი დაიღუპა და 13 დაშავდა. ამასთან, დრონის ნამსხვრევების ჩამოვარდნის გამო, უკრაინის დედაქალაქში მინისტრთა კაბინეტის შენობას ცეცხლი გაუჩნდა.
