პუტინი არ შეცვლილა და არც შეიცვლება, ის მტაცებელია. ბოლო 25 წელში მან ოთხი ომი დაიწყო: ჩეჩნეთი, საქართველო, ყირიმი და უკრაინაში სრულმასშტაბიანი შეჭრა, - ამის შესახებ ევროკომისიის პრეზიდენტმა, ურსულა ფონ დერ ლაიენმა პოლონეთ-ბელარუსის საზღვართან პოლონეთის პრემიერ-მინისტრთან, დონალდ ტუსკთან ერთად გამართულ პრესკონფერენციაზე განაცხადა.
„ჩვენ ვიცით, რომ პუტინი არ შეცვლილა და არც შეიცვლება, ის მტაცებელია. ბოლო 25 წელში მან ოთხი ომი დაიწყო: ჩეჩნეთი, საქართველო, ყირიმი და უკრაინაში სრულმასშტაბიანი შეჭრა.
გამოცდილებიდან ვიცით, რომ მისი გაკონტროლება მხოლოდ ძლიერი შეკავების ძალით შეიძლება. ამიტომ, ჩვენ კოორდინირებულები, ზუსტები და სწრაფები უნდა ვიყოთ ჩვენი თავდაცვითი პოზიციების გაზრდაში ევროკავშირსა და კონკრეტულად ფრონტის ხაზზე მყოფ ქვეყნებში“, - განაცხადა ფონ დერ ლაიენმა,
მისი თქმით, უკრაინაში თავდაცვის პირველი ხაზი ძლიერი უკრაინული არმიაა.
“თავდაცვის მეორე ხაზი მრავალეროვნული ჯგუფია, „მსურველთა კოალიცია“, ამერიკელების მხარდაჭერით, ხოლო მესამე და ყველაზე მნიშვნელოვანი თავდაცვის ხაზი ჩვენივე თავდაცვითი პოზიციაა“, - აღნიშნა ურსულა ფონ დერ ლაიენმა.
პოლონეთის პრემიერ-მინისტრი დონალდ ტუსკი და ევროკომისიის პრეზიდენტი ურსულა ფონ დერ ლაიენი კვირას პოლონეთ-ბელორუსის საზღვარზე ჩავიდნენ.
ლიდერების „მოლაპარაკებების მთავარი თემა იქნება თავდაცვა და უსაფრთხოება, მათ შორის პოლონეთის აღმოსავლეთ საზღვრის დაცვა და SAFE პროგრამა. პრემიერ-მინისტრი დონალდ ტუსკი და ურსულა ფონ დერ ლაიენი ასევე განიხილავენ სამშვიდობო პროცესს და კიევის უსაფრთხოების გარანტიებს, ასევე ევროკავშირის პროგრამებს, რომლებიც მიზნად ისახავს ევროპის თავდაცვისუნარიანობის გაძლიერებას“, - ნათქვამია პოლონეთის მთავრობის განცხადებაში.
