შეერთებულმა შტატებმა, დონალდ ტრამპის ხელმძღვანელობით, უკრაინისთვის ახალი შეტევითი შესაძლებლობების მიწოდება დაიწყო.

„ტრამპი უკრაინას აძლევს საშუალებას, განაგრძოს თავის დაცვა, უფრო ფართო დარტყმების მიყენების შესაძლებლობების მინიჭებით, რაც მათ შეტევაში დაეხმარება. ბოლო ერთი თვის განმავლობაში მათ მწყობრიდან უკვე გამოიყვანეს რუსეთის ნავთობგადამამუშავებელი სიმძლავრის დაახლოებით 20%, - ამის შესახებ ნატო-ში აშშ-ის ელჩმა მეთ უიტაკერმა Fox News-თან ინტერვიუში განაცხადა.

მისი თქმით, აშშ-ის ამჟამინდელი პრეზიდენტის პოლიტიკა მნიშვნელოვნად განსხვავდება მისი წინამორბედის პოლიტიკისგან.

„დიდი ალბათობით, უკრაინელები გამოიყენებენ მათ [შესაძლებლობებს] და ეს აშკარად ძალიან განსხვავდება იმისგან, რაც ჯო ბაიდენმა გააკეთა“, - ხაზგასმით აღნიშნა დიპლომატმა.

ვაშინგტონმა ცოტა ხნის წინ დაამტკიცა უკრაინისთვის 3,350 შორ მანძილზე მოქმედი რაკეტის 850 მილიონ დოლარად მიყიდვა.

გარიგება დააფინანსეს დანიამ, ნიდერლანდებმა და ნორვეგიამ. რაკეტების მოქმედების რადიუსი 150-დან 280 მილამდეა, თუმცა მათი გამოყენების პირობები გაურკვეველი რჩება.

დონალდ ტრამპს, ვლადიმირ პუტინსა და ვოლოდიმირ ზელენსკის შორის შესაძლო შეხვედრაზე კომენტირებისას, უიტაკერმა აღნიშნა: „ტრამპი პუტინს იმდენ დროს მისცემს, რამდენიც მას დასჭირდება“.

„ორივე მხარე კვლავ მოლაპარაკებებს აწარმოებს და ეს კარგია“, - დასძინა ელჩმა.