ევროპული საბჭოს ვიდეოკონფერენციის შემდეგ ლისაბონში გამართულ პრესკონფერენციაზე, ევროპული საბჭოს პრეზიდენტმა ანტონიო კოშტამ განაცხადა, რომ რუსეთის მიერ ცეცხლის შეწყვეტა ევროკავშირისთვის სამშვიდობო მოლაპარაკებებში პრიორიტეტია. წინააღმდეგ შემთხვევაში, ევროკავშირი სასანქციო ზეწოლას გააძლიერებს.
„პირველი ნაბიჯის სახით, რუსეთმა დაუყოვნებლივ უნდა შეწყვიტოს ძალადობა. ჩვენი მთავარი პრიორიტეტი უნდა იყოს მკვლელობების შეჩერება.
არ აქვს მნიშვნელობა, ცეცხლის შეწყვეტას ვუწოდებთ თუ ზავს; მნიშვნელოვანია, რომ თუ რუსეთი მოთხოვნებს არ შეასრულებს, სანქციების მეშვეობით ზეწოლა შევინარჩუნოთ,“ - თქვა კოშტამ.
ამასთან, დასძინა, რომ ახლა, „უფრო მეტად, ვიდრე ოდესმე, კრიტიკულად მნიშვნელოვანია რუსეთზე ძლიერი ზეწოლის შენარჩუნება“.
„ახლა დროა, დავაჩქაროთ ჩვენი პრაქტიკული მუშაობა ნატო-ს მე-5 მუხლის მსგავსი გარანტიების შესაქმნელად შეერთებული შტატების აქტიური მონაწილეობით.“მსურველთა კოალიცია“ ამ პროცესში მჭიდროდ უნდა იყოს ჩართული.
ამასთან, განაცხადა, რომ„მომავალი გარანტიების საფუძველი უკრაინის საკუთარი შეიარაღებული ძალებია, რომლებიც გაძლიერებას საჭიროებს“.
უკრაინის შეიარაღებული ძალები თავდაცვის პირველი ხაზი იქნება. ამიტომ, ჩვენ უნდა გავაძლიეროთ, გავამყაროთ და განვაახლოთ უკრაინისადმი ჩვენი სამხედრო მხარდაჭერა.
ევროკავშირი უკვე სამხედრო და ეკონომიკური დახმარების უმსხვილესი მიმწოდებელია. და ჩვენ გავაგრძელებთ გზების ძიებას, რომლითაც შეგვიძლია მეტი გავაკეთოთ“, - თქვა კოშტამ.
