აშშ-ის პრეზიდენტ დონალდ ტრამპსა და რუსეთის პრეზიდენტ ვლადიმერ პუტინს შორის ერთი-ერთზე შეხვედრის ნაცვლად სამი-სამზე შეხვედრა ჩატარდება. ამის შესახებ ინფორმაციას ამერიკული ტელეარხი NBC News თეთრი სახლის მაღალჩინოსანზე დაყრდნობით ავრცელებს.
თეთრი სახლის წარმომადგენლის თქმით, ტრამპთან ერთად დღეს პუტინთან და მის მრჩევლებთან შესახვედრად სახელმწიფო მდივანი მარკო რუბიო და სპეციალური წარმომადგენელი სტივ უიტკოფი იქნებიან.
ასევე მოსალოდნელია, რომ თარჯიმნებიც იქნებიან.
აქამდე ინფორმაცია ვრცელდებოდა, რომ ტრამპსა და პუტინს შორის შეხვედრა ერთი-ერთზე ფორმატში წარიმართებოდა.
ორმხრივ სამუშაო სადილს რუბიო, თავდაცვის მდივანი პიტ ჰეგსეთი, სახაზინო მდივანი სკოტ ბესენტი, ვაჭრობის მდივანი ჰოვარდ ლუტნიკი, ადმინისტრაციის უფროსი სუზი უაილსი და უიტკოფი დაესწრებიან.
ტრამპის სპეციალური წარმომადგენელი უკრაინის საკითხებში, კიტ კელოგი, დელეგაციის შემადგენლობაში არ შედის.
