უახლოეს მომავალში ჩრდილოეთ კორეა რუსეთში დამატებით დაახლოებით 6 000 სამხედროს გაგზავნას გეგმავს.

ამის შესახებ უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა, კირილო ბუდანოვმა, გამოცემა The Japan Times-თან ინტერვიუში განაცხადა.

მისი თქმით, ჩრდილოეთ კორეა ასევე გეგმავს რუსეთის ფედერაციაში 50-დან 100-მდე ერთეული ტექნიკის გაგზავნას, მათ შორის M2010 (Cheonma-D)-ის ტიპისსაბრძოლო ტანკებსა და BTR-80-ის ტიპისჯავშანტრანსპორტიორებს, მათი თქმით, საინჟინრო სამუშაოების შესასრულებლად.

„ზოგიერთი მათგანი შეიძლება მართლაც იყოს ჩართული განაღმვით სამუშაოებსა და სიმაგრეების მშენებლობაში, მაგრამ ყველა ამით იქნება დაკავებული?“ - აღნიშნა ბუდანოვმა.

მან მოსკოვსა და ფხენიანს შორის სამხედრო თანამშრომლობის მასშტაბებსა და შედეგებზე ისაუბრა და აღნიშნა, რომ ამჟამად მსოფლიოში მხოლოდ სამ ქვეყანას აქვს ფართო ფრონტის ხაზზე თანამედროვე ომის წარმოების გამოცდილება.

მისი თქმით, რუსეთი გულუხვად აფინანსებს ჩრდილოეთ კორეის ჯარების მონაწილეობას უკრაინის წინააღმდეგ ომში.

„კრემლი იხდის ყველა სამხედრო აღჭურვილობისა და ჯარისკაცებისთვის. საუბარია ათობით მილიარდ დოლარზე და ჩრდილოეთ კორეის ეკონომიკისთვის, რომელიც მსოფლიოში ერთ-ერთი ყველაზე იზოლირებული ქვეყანაა, ეს ძალიან სერიოზული ფულია“, - აღნიშნა უკრაინის დაზვერვის ხელმძღვანელმა.

მან დასძინა, რომ უკრაინა მუდმივად ხაზს უსვამს, რომ მოსკოვსა და ფხენიანს შორის თანამშრომლობა საფრთხეს არა მხოლოდ უკრაინისთვის წარმოადგენს.

„ამჟამად მსოფლიოში მხოლოდ სამი ქვეყანაა, რომლებსაც აქვთ გამოცდილება თანამედროვე ომის წარმოებაში ძალიან ფართო ფრონტის ხაზზე თითქმის ყველა არსებული საშუალების გამოყენებით - ესენი არიან უკრაინა, რუსეთი და ჩრდილოეთ კორეა“, - აღნიშნა ბუდანოვმა.