ისრაელის პრემიერ-მინისტრმა ბენიამინ ნეთანიაჰუმ გააკრიტიკა თავისი ბრიტანელი კოლეგა კირ სტარმერი პალესტინის სახელმწიფოდ აღიარების განზრახვის გამოცხადების გამო.
ნეთანიაჰუმ განაცხადა, რომ სტარმერი „ჰამასის“ ტერორიზმს ხელს უწყობს და გააფრთხილა, რომ დიდი ბრიტანეთიც რისკის ქვეშაა.
„სტარმერი ახალისებს „ჰამასის“ მონსტრულ ტერორიზმს და სჯის მის მსხვერპლებს. დღეს ისრაელის საზღვარზე არსებული ჯიჰადისტური სახელმწიფო ხვალ ბრიტანეთს დაემუქრება“, - განაცხადა ისრაელის პრემიერმა.
მან ასევე დასძინა, რომ „ჯიჰადისტი ტერორისტების დამშვიდების პოლიტიკა ყოველთვის წარუმატებლად მთავრდება“.
„ეს თქვენს შემთხვევაშიც მარცხით დასრულდება“, - ნათქვამია ისრაელის პრემიერ-მინისტრის ოფიციალურ გვერდზე გამოქვეყნებულ პოსტში.
გაერთიანებული სამეფოს პრემიერ-მინისტრმა, კირ სტარმერმა განაცხადა, რომ ლონდონი პალესტინის სახელმწიფოს სექტემბერში აღიარებს, თუ ისრაელი ღაზის სექტორში ცეცხლის შეწყვეტისთვის ნაბიჯებს არ გადადგამს.
მანამდე პალესტინის სახელმწიფოს აღიარების განზრახვის შესახებ საფრანგეთმაც განაცხადა.
