აზერბაიჯანის პრეზიდენტმა ილჰამ ალიევმა პარალელები გაავლო უკრაინაში არსებულ ვითარებასა და სომხეთთან მთიან ყარაბაღთან დაკავშირებულ კონფლიქტს შორის.
მან აღნიშნა, რომ აზერბაიჯანელებმა ტერიტორიები დაიბრუნეს და უკრაინელებსაც იგივეს გაკეთება ურჩია.
ამის შესახებ ალიევმა შუშას III გლობალურ მედიაფორუმზე უკრაინელი ჟურნალისტის, დმიტრი გორდონის, კითხვაზე პასუხის გაცემისას განაცხადა.
„რამდენიმე წლის წინ, ერთ-ერთ ღონისძიებაზე ერთხელ მომეცა შესაძლებლობა, მეპასუხა უკრაინის წარმომადგენლის კითხვაზე. მსგავსი კითხვა იყო. ჩემი პასუხი არ განსხვავდება იმისგან, რაც მაშინ ვთქვი. და მე ვფიქრობ, რომ ეს შეესაბამება უკრაინელი ხალხის მისწრაფებებს: არასდროს დათანხმდეთ ოკუპაციას. ეს არის მთავარი რჩევა. ჩვენ ასე მოვიქეცით“, - განაცხადა ილჰამ ალიევმა.
ალიევმა აღნიშნა, რომ აზერბაიჯანმა მოახერხა მთიანი ყარაბაღის დაბრუნება, რომელსაც დიდი ხნის განმავლობაში სომხეთის არმია აკონტროლებდა. მან თქვა, რომ გაერო-ს უშიშროების საბჭომ ერთხელ მიიღო ოთხი რეზოლუცია, რომლის მიხედვითაც სომხეთს ამ ტერიტორიიდან ჯარები უნდა გაეყვანა. თუმცა, არცერთი მათგანი არ შესრულებულა.
„ჩვენ გადავწყვიტეთ, რომ შევქმნიდით ახალ რეალობებს და თქვენ მათ შეეგუებოდით. და ასეც მოხდა.
რაც დასაწყისში ვთქვი, შესაძლოა ძალიან მარტივად და თავიდან არიდების მცდელობასავით ჩანდეს, თუმცა ამის მიღმა სინამდვილეში დგას ის, რაც ჩვენ გამოვიარეთ როგორც ომში, ისევე მოლაპარაკებების მაგიდაზე და იმის შემდეგ, რაც სუვერენიტეტი სრულად აღვადგინეთ. ზოგიერთი საერთაშორისო აქტორის მხრიდან ყველა მუქარაზე, ზეწოლაზე, შანტაჟსა და სხვა შეუფერებელ ქმედებებზე რომ მოვყვე, ამისთვის ალბათ ცალკეული შეხვედრა იქნება საჭირო. თუმცა, რომ დავუბრუნდე, რაც ვთქვი - არასდროს დანებდეთ და არასდროს შეეგუოთ ტერიტორიული მთლიანობის დარღვევას.
პრეზიდენტმა აღნიშნა, რომ აზერბაიჯანმა სამხედრო გზით აღადგინა კონტროლი მთიან ყარაბაღზე. მან უკრაინელებს უსურვა, რომ არ დანებებულიყვნენ, იგივე გააკეთონ და დაიბრუნონ რუსეთის მიერ ოკუპირებული ტერიტორიები.
