ისრაელში ირანის თავდასხმის შედეგად დაღუპულთა რაოდენობა 3-მდე გაიზარდა.
შაბათს დილით, 14 ივნისს, ისრაელის სასწრაფო-სამედიცინო სამსახურებმა განაცხადეს, რომ თელ-ავივის სამხრეთით მდებარე დასახლების საცხოვრებელ უბანში რაკეტის ჩამოვარდნის შედეგად დაიღუპა ორი ადამიანი - 60 წლის ქალი და 45 წლის კაცი.
მანამდე, ერთი ქალი დაიღუპა პარასკევს გვიან ღამით, ქალაქ რამათ განში.
გავრცელებული ინფორმაციით, სარაკეტო თავდასხმის შედეგად დაშავდა 19 ადამიანი.
ამავდროულად, გაეროში ირანის წარმომადგენელმა განაცხადა, რომ ისრაელის თავდასხმის შედეგად ირანში დაიღუპა 78 ადამიანი, ხოლო 320-ზე მეტი დაშავდა.
13-14 ივნისის ღამეს ირანმა საჰაერო იერიში მიიტანა ისრაელზე. ისრაელის თავდაცვის ძალების განცხადებით, ირანული რაკეტების უმეტესი ნაწილი საჰაერო თავდაცვის მიერ იქნა განეიტრალებული. რამდენმე რაკეტა ჩამოვარდა ისრაელის ცენტრალურ ნაწილში, მათ შორის თელ-ავივსა და მის შემოგარენში.
ისრაელის არმია აცხადებს, რომ გააგრძელებს სამიზნეების განადგურებას ირანში.
13 ივნისს ისრაელმა განაცხადა, რომ დაარტყა ირანის ბირთვული პროგრამის ცენტრს ქალაქ ნათანზში, სადაც მიმდინარეობდა ურანის გამდიდრება ბირთვული ბომბის შესაქმნელად. დარტმის შედეგად დაიღუპნენ გენშტაბის უფროსი, გენერალ-ლეიტენანტი ბაღერი, ისლამური რევოლუციის გუშაგთა კორპუსის მეთაური, გენერალ-ლეიტენანტი სალამი და საჰაერო თავდაცვის ჯარების შტაბის ხელმძღვანელი, გენერალ-ლეიტენანტი რაშიდი.
ირანის უზენაესი ლიდერი აიათოლა ალი ხამენეი ისრაელს „საშინელი შედეგებით“ დაემუქრა.
