რუსეთმა უკრაინას გადასცა მემორანდუმი, რომელიც მოიცავს სრული ცეცხლის შეწყვეტის შესახებ წინადადებებსა და ვარიანტებს.
ამის შესახებ 2 ივნისს თურქეთში გამართული შეხვედრის შემდეგ რუსული დელეგაციის ხელმძღვანელმა ვლადიმირ მედინსკიმ განაცხადა.
რუსული მემორანდუმი ორი ნაწილისგან შედგება: მდგრადი მშვიდობის მიღწევისა და სრული ცეცხლის შეწყვეტისკენ გადადგმული ნაბიჯების შესახებ.
მედინსკის თქმით, რუსეთი და უკრაინა ტყვეების ყველაზე მასშტაბურ გაცვლაზე შეთანხმდნენ.
„ჩვენ შევთანხმდით ყველაზე მასშტაბურ გაცვლაზე. მომავალ სამშაბათს. ყველა მძიმედ დაჭრილი, მძიმედ დაავადებული გაცვლილი იქნება. ეს ჩვენი მხრიდან ჰუმანიტარული ჟესტია“, - განაცხადა მედინსკიმ.
რუსეთი მომავალ კვირას კიევს გადასცემს 6000 უკრაინელი ჯარისკაცის ცხედარს.
ავადმყოფები და მძიმედ დაჭრილები გაიცვლებიან „ყველა ყველაზე“ პრინციპით. გარდა ამისა, მოსკოვი და კიევი 25 წლამდე ასაკის მეომრებს გაცვლიან.
„იგივე ფორმულის თანახმად, ყველა ახალგაზრდა ჯარისკაცი გაიცვლება.“
ამავდროულად, გაცვლის საერთო ლიმიტი თითოეულ მხარეს არანაკლებ ათასი იქნება, შესაძლოა მეტიც“, - თქვა მედინსკიმ.
მოსკოვი და კიევი შექმნიან კომისიას, რომელიც პოლიტიკური გადაწყვეტილებების გარეშე, რეგულარულად გაცვლის მძიმედ დაჭრილ ჯარისკაცებს.
რუსეთმა ასევე შესთავაზა უკრაინას ორი-სამი დღით „კონკრეტული ცეცხლის შეწყვეტა“ ფრონტის გარკვეულ მონაკვეთებზე, რათა მეთაურებმა შეძლონ თავიანთი ჯარისკაცების ცხედრების გამოყვანა.
„ჩვენ ორი ან სამი დღით ფრონტის გარკვეულ მონაკვეთებში ცეცხლის შეწყვეტა შევთავაზეთ, რათა მეთაურებმა ჯარისკაცების ცხედრები მიიღონ“, - განაცხადა მედინსკიმ.
მედინსკის თქმით, შეხვედრაზე მხარეებმა „ბავშვების საკითხიც განიხილეს და მან უკრაინას 339 ბავშვის სია გადასცა“.
„ეს სია კიდევ ერთხელ აჩვენებს იმას, რომ სამწუხაროდ, უკრაინის ხელისუფლებამ ბავშვთა გატაცების საკითხი სანხაობად აქცია, რომელიც ევროპელებისთვისაა განკუთვნილი“, - აღნიშნა მედინსკიმ.
