გერმანიის კანცლერმა ფრიდრიხ მერცმა პარასკევს, 16 მაისს, სტამბოლში რუსეთისა და უკრაინის დელეგაციებს შორის რუსული აგრესიის დასრულების შესახებ გამართულ მოლაპარაკებებს „პირველი ძალიან მცირე, მაგრამ დადებითი სიგნალი“ უწოდა.
„ამ მიმართულებით მეტი უნდა გავაკეთოთ, განსაკუთრებით დიპლომატიური ძალისხმევის თვალსაზრისით, მაგრამ ასევე უკიდურესად მტკიცე უნდა ვიყოთ ამ ქვეყნის სამხედრო მხარდაჭერაში“, - განაცხადა მერცმა. მან გერმანიასა და უკრაინის სხვა პარტნიორებზე იგულისხმა.
„ყველანი ვთანხმდებით, რომ რუსულ მხარეს ამ კვირაში კარგი შესაძლებლობა ჰქონდა, წინა ცეცხლის შეწყვეტის შემდეგ სამშვიდობო შეთანხმებაზე პირველი მოლაპარაკებები გაემართა.
„ჩვენ ძალიან იმედგაცრუებულები ვართ, რომ ეს არ მოხდა“, - განაცხადა გერმანიის კანცლერმა და დასძინა: „სამწუხაროდ, ჩვენს მიერ აქამდე განხორციელებული დიპლომატიური ძალისხმევა წარმატებული არ აღმოჩნდა რუსეთის მხრიდან სწორი მიმართულებით პირველი ნაბიჯების გადადგმის სურვილის არარსებობის გამო“.
მერცმა ასევე განაცხადა, რომ ალბანეთის დედაქალაქ ტირანაში მიმდინარე ევროპული პოლიტიკური გაერთიანების მე-6 სამიტის ფარგლებში, მან, უკრაინის პრეზიდენტ ვოლოდიმირ ზელენსკისთან, ასევე საფრანგეთის, დიდი ბრიტანეთისა და პოლონეთის ლიდერებთან ერთად, სატელეფონო საუბარი გამართა აშშ-ის პრეზიდენტ დონალდ ტრამპთან.
„ჩვენ მას მუდმივად ვაცნობებთ ჩვენი მხრიდან მოლაპარაკებების მიმდინარეობის შესახებ. ჩვენ მზად ვართ გავაკეთოთ ყველაფერი, რათა ამერიკელები ჩვენს მხარეს იყვნენ“, - განაცხადა მერცმა.
