ტირანაში ევროპული პოლიტიკური გაერთიანების (EPC) სამიტის დაწყებამდე, ევროკომისიის პრეზიდენტმა ურსულა ფონ დერ ლაიენმა განაცხადა, რომ რუსეთის ლიდერის, ვლადიმირ პუტინის ბოლოდროინდელი ქმედებები მიუთითებს იმაზე, რომ მას არ სურს მშვიდობა. მისი თქმით, შესაბამისად, რუსეთზე სანქციების ზეწოლა უნდა გაიზარდოს.
ევროკომისიის პრეზიდენტმა აღნიშნა, რომ პუტინმა თავდაპირველად ცეცხლის შეწყვეტისკენ მოუწოდა 9 მაისის წინა დღეს, თუმცა შემდეგ ეს დაპირება არ შეასრულა.
შემდეგ, მისი თქმით, უკრაინამ, რომელსაც მხარს უჭერდნენ ევროკავშირი და შეერთებული შტატები, მოითხოვა სრული და უპირობო ცეცხლის შეწყვეტა 30 დღის განმავლობაში, მაგრამ პუტინმა უარყო შეთავაზება.
„და ბოლოს, მან შესთავაზა უკრაინასა და რუსეთს შორის პირდაპირი შეხვედრა თურქეთში. პრეზიდენტი ზელენსკი შეხვედრისთვის მზად იყო. პრეზიდენტი პუტინი არ გამოცხადდა. და ეს აჩვენებს პრეზიდენტ პუტინის რეალურ რწმენას, რომ მას მშვიდობა არ სურს. ამიტომ, ჩვენ უნდა გავზარდოთ ზეწოლა“, - თქვა მან.
მან დასძინა, რომ სწორედ ამიტომ მუშაობს ევროკავშირი სანქციების ახალ პაკეტზე.
„ეს პაკეტი, მაგალითად, მოიცავს სანქციებს ჩრდილოეთ ნაკადი 1-ისა და ჩრდილოეთ ნაკადი 2-ის წინააღმდეგ.
ის მოიცავს სიაში რუსული „ჩრდილოვანი ფლოტის“ გემების შეყვანას, ასევე ნავთობის ფასის ზედა ზღვარის შემცირებას და რუსეთის ფინანსური სექტორის წინააღმდეგ დამატებით სანქციებს.
ჩვენთვის მნიშვნელოვანია მშვიდობის მიღწევა და ამიტომ უნდა გავზარდოთ ზეწოლა პრეზიდენტ პუტინზე მანამდე, ვიდრე ის მშვიდობისთვის მზად არ იქნება“, - განაცხადა ფონ დერ ლაიენმა.
