კრიზისიდან გამოსვლის ერთადერთი გზა ახალი არჩევნებია, - ამის შესახებ ბრიფინგზე საქართველოს მეხუთე პრეზიდენტმა სალომე ზურაბიშვილმა განაცხადა.
"6 თვეა, საქართველოში ღრმა პოლიტიკური კრიზისი გრძელდება და ქვეყანა პარალიზებულია. ამ კრიზისზე პასუხისმგებელი მთლიანად ბიძინა ივანიშვილია და არა ჩვენი პარტნიორები - როცა ცდილობენ, თქვან, რომ თითქოს, ჩვენ იზოლაციაზე ხან ევროკავშირია პასუხისმგებელი, ხან კი აშშ არის პასუხისმგებელი იმაზე, რომ ჩვენ ცუდ დღეში ვართ. პასუხისმგებელი არავინაა იმ ადამიანის გარდა, რომელიც, შეიძლება, რუსეთის ინსტრუქციებით, მაგრამ ერთპიროვნულად მართავს ამ ქვეყანას და საქართველო ჩიხსა და უფსკრულში მიჰყავს.
აქედან გამოსვლის ერთადერთი გზა ახალი არჩევნებია. ეს ყველა ქვეყანაში გამოცდილი ფორმაა, თუ როგორ გამოდიხარ ღრმა კრიზისიდან ისე, რომ ეს გამოსვლა მშვიდობიანი იყოს და ახალი დესტაბილიზაცია არ გამოიწვიოს, რაც საქართველოს ნამდვილად არ სჭირდება. ჩვენ ძალიან ბევრი პრობლემა გვაქვს, რადგან, 6 თვეა, ეს ქვეყანა გაჩერებულია. დღეს საქართველოსთვის საჭიროა, რომ ახალი არჩევნები ძალიან სწრაფად დაინიშნოს, ამ მდგომარეობიდან სწორედ არჩევნებით გამოვიდეთ და ყველა ის საჭირო გადაწყვეტილება მივიღოთ, რომელიც ამ ქვეყანას გააცოცხლებს. ეს ქვეყანა დღეს გაყინულია", - განაცხადა სალომე ზურაბიშვილი.
