იემენელი "ჰუსიტები", რომელსაც აშშ ტერორისტულ დაჯგუფებად მიიჩნევს, რუსულ და ჩინურ გემებს წითელ ზღვაში უსაფრთხო დერეფანს ჰპირდებიან.
რუსულ გაზეთ "იზვესტიასთან" ინტერვიუში "ჰუსიტების" პოლიტიკური ხელმძღვანელობის წარმომადგენელმა განაცხადა, რომ იემენის რეგიონში საფრთხე არ ემუქრება რუსეთის, ჩინეთისა და სხვა ქვეყნების ხომალდებს, რომლებიც არ ასოცირდებიან ისრაელთან.
ამავრდოულად, გავრცელდა ინფორმცია, რომ "ჰუსიტებმა" ორი ხომალდსაწინააღმდეგო ბალისტიკური რაკეტა გაისროლეს ამერიკული გემის მიმართულებით, რომელიც ადენი ყურეში იმყოფებოდა.
აშშ-ის ცენტრალური სარდლობის ინფორმაციით, ამ თავდასხმას მსხვერპლი ან ხომალდის დაზიანება არ მოჰყოლია.
ირანის მიერ მხარდაჭერილი იემენელი ამბოხებული "ჰუსიტები" გასული წლის ნოემბრიდან თავს ესხმიან დასავლეთის კომერციულ ხომალდებს, რომლებიც წითელ ზღვას გადიან. ამბოხებულთა განცხადებით, მათი ეს ქმედება პროტესტია ღაზას სექტორში ისრაელის სამხედრო ოპერაციის წინააღმდეგ და პირობა დადეს, რომ თავს დაესხმებიან ისრაელთან დაკავშირებულ ყველა გემს.
12 იანვრის ღამეს შეერთებულმა შტატებმა და დიდმა ბრიტანეთმა, ნიდერლანდების, კანადის, ავსტრალიისა და ბაჰრეინის მხარდაჭერით, მასიური თავდასხმები დაიწყეს იემენში "ჰუსიტთა" სამხედრო ობიექტებზე.
