ჩრდილოეთ კორეამ წყალქვეშა ბირთვული იარაღის სისტემები აშშ-ის, იაპონიისა და სამხრეთ კორეის სამხედრო სწავლების საპასუხოდ გამოსცადა.
ჩრდილოეთ კორეის თავდაცვის უწყების ცნობით, ცდები იაპონიის ზღვის აკვატორიაში ჩატარდა. მათივე ცნობით, გამოსცადეს „ჰეილ-l-5-23“ სისტემა, რომელიც ჯერ კიდევ დამუშავების პროცესშია. წარმატებული იყო თუ არა ეს გამოცდა, დაზუსტებული არ არის.
„ჩვენი არმიის წყალქვეშა ბირთვული მზადყოფნა უმჯობესდება და ბუნებრივია ზღვაში გაგრძელდება სხვადასხვა საპასუხო ქმედება აშშ-ის სამხედრო-საზღვაო ძალებისა და მისი მოკავშირეების მტრული სამხედრო აქციების შეკავების მიზნით“, - აცხადებენ ჩრდილოეთ კორეის თავდაცვის სამინისტროში.
იაპონიის, აშშ-სა და სამხრეთ კორეის სამხედრო-საზღვაო ძალებმა 14-17 იანვარს ერთობლივი სამხედრო წვრთნები ჩაატარეს კორეის ნახევარკუნძულის სამხრეთით აღმოსავლეთ-ჩინეთის ზღვის აკვატორიაში. წვრთნებში მონაწილეობდა რვა სამხედრო ხომალდი, მათ შორის ამერიკული ბირთვული ავიამზიდი Carl Vinson და კრესიერი Princeton, რომელიც აღჭურვილია Aegis-ის მრავალფუნქციური სამხედრო სისტემებით.
