ჩრდილოატლანტიკური ალიანსი მზად არის რუსეთის შესაძლო თავდასხმისთვის. ამის შესახებ ნატო-ს სამხედრო კომიტეტის თავმჯდომარემ რობ ბაუერმა და ევროპაში მოკავშირე ძალების უმაღლესმა სარდალმა, აშშ-ის ევროპული სარდლობის მეთაურმა, გენერალმა კრისტოფერ კავოლიმ ბრიუსელში ერთობლივ პრესკონფერენციაზე განაცხადეს.
"ჩვენ ვართ თავდაცვითი ალიანსი, ამიტომ მზად უნდა ვიყოთ და მზად ვართ. ამასთან, ჩვენ ვუმჯობესდებით, ვზრდით მზადყოფნის დონეს გარკვეულ სფეროებში საუკეთესო უნარების მქონე მეტი პერსონალით," - თქვა ბაუერმა.
ნატო-ს სარდლობის წარმომადგენლებმა გაიხსენეს, რომ ალიანსის სტრატეგიაში და გეგმებში აღწერილია ორ საფრთხე - რუსეთი და ტერორისტულ დაჯგუფებები. „გეგმები, რომლებიც ჩვენ შევიმუშავეთ და რომლებიც დამტკიცდა ვილნიუსში, მიმართულია რუსეთის მხრიდან მომდინარე საფრთხის წინააღმდეგ“, - განაცხადა ნატო-ს სამხედრო კომიტეტის ხელმძღვანელმა.
თავის მხრივ, კავოლიმ თქვა: "დიახ, ჩვენ მზად ვართ". ამავდროულად, მან თებერვალში გამოაცხადა ათწლეულების განმავლობაში ყველაზე მასშტაბური ოთხთვიანი წვრთნების დაწყება, რომელშიც დაახლოებით 90 000 ადამიანი იქნება ჩართული. მანევრები მოიცავს ევროპის ტერიტორიას ნორვეგიიდან რუმინეთამდე. სააგენტო dpa-ს ცნობით, წვრთნების - Steadfast Defender-ის სცენარი არის რუსეთის თავდასხმა მოკავშირეთა ტერიტორიაზე, რაც იწვევს ნატო-ს კოლექტიური თავდაცვის ხელშეკრულების მე-5 მუხლის ამოქმედებას.
ბაუერის თქმით, წვრთნების ეს მასშტაბი ალიანსის ახალი მზადყოფნის დემონსტრირებაა. ”ეს არის ჯარის რეკორდული რაოდენობა, რომელიც ჩვენ შეგვიძლია განვათავსოთ და ჩავატაროთ წვრთნები ამ მასშტაბით, შეერთებული შტატებიდან ევროპამდე”, - თქვა მან. ამასთან, სამხედრო კომიტეტის ხელმძღვანელმა ხაზგასმით აღნიშნა, რომ ომი არ არის მხოლოდ სამხედროების საქმე. „როცა საქმე ეხება ომს, როგორსაც ვხედავთ უკრაინაში, ეს გავლენას ახდენს მთელ საზოგადოებაზე“, - აღნიშნა ბაუერმა.
ბრიუსელში 17 და 18 იანვარს ნატო-ს უმაღლესი სამხედრო ლიდერების შეხვედრა გაიმართა.
