ევროკავშირის ლიდერები მზად იყვნენ ბრიუსელში, ევროკავშირის სამიტზე მიეწვიათ უკრაინის პრეზიდენტი ვოლოდიმირ ზელენსკი, მაგრამ ეს არ გააკეთეს უნგრეთის პრემიერ-მინისტრ ვიქტორ ორბანის შესაძლო რეაქციის გამო. იუწყება "ევროპეისკა პრავდა" Politico-ზე დაყრდნობით.
რაც შეეხება ზელენსკის, მასაც სურდა სამიტს პირადად დასწრებოდა.
ორი ევროპელი დიპლომატის თქმით, ევროკავშირის ქვეყნების წარმომადგენლების შეხვედრაზე, რამდენიმე ელჩმა გამოხატა სიფრთხილე ზელენსკის სამიტზე მიწვევასთან დაკავშირებით.
როგორც გამოცემა აღნიშნავს, ისინი შიშობდნენ, რომ სამიტზე უკრაინის პრეზიდენტის დასწრებას, შესაძლოა გამოეწვია პრემიერ-მინისტრ ვიქტორ ორბანის ანტაგონიზმი და მისი პოზიცია უკრაინის მიმართ კიდევ უფრო უკომპრომისო გამხდარიყო.
