ისრაელის პრემიერ-მინისტრმა ბენიამინ ნეთანიაჰუმ ტელეკომპანია NBC-თან ინტერვიუში ღაზის ალ-შიფას საავადმყოს შესახებ ისაუბრა.
„წუხელ ჩვენ მათ შევთავაზეთ საკმარისი საწვავი საავადმყოფოსთვის, ბავშვთა ინკუბატორებისთვის და ა.შ.“ - განაცხადა ნეთანიაჰუმ და უარყო ინფორმაცია, რომ თითქოს საავადმყოფოს უარი ეთქვა საწვავის მიწოდებაზე.
„ცხადია, ჩვენ არ ვართ ომში პაციენტების ან მშვიდობიანი მოსახლეობის წინააღმდეგ. მე ყოველი მშვიდობიანი მოქალაქის, ყველა ბავშვის დაღუპვა ტრაგედიად მიმაჩნია”, - აღნიშნა მან.
ექიმების ჯგუფმა განაცხადა, რომ საავადმყოფოში ორი დღენაკლული ბავშვი გარდაიცვალა ელექტროენერგიის გათიშვის გამო, ხოლო „ჰამასის“ მიერ კონტროლირებადმა ჯანდაცვის სამინისტრომ განაცხადა, რომ ხუთი დაჭრილი დაიღუპა, რადგან ელექტროენერგია არ იყო ოპერაციების ჩასატარებლად.
ნეთანიაჰუმ ასევე თქვა, რომ ისრაელი აპირებს ააშენოს საველე საავადმყოფოები, სადაც პაციენტების ტრანსპორტირება შეიძლება.
ისრაელის პრეზიდენტმა ისააკ ჰერცოგმა BBC-ს დღეს დილით განუცხადა, რომ ალ-შიფას საავადმყოფოში "ყველაფერი მუშაობს" და რომ პრეტენზიები ელექტროენერგიასთან დაკავშირებით "ჰამასის“ მიერ იყო შეთხზული.
ისრაელის თავდაცვის ძალების პრესსამსახურმა გაავრცელა აუდიოჩანაწერი, რომელშიც ნათქვამია, რომ ისრაელის არმიის ოფიცერი ალ-შიფას საავადმყოფოს თანამშრომელთან ერთად კოორდინაციას უწევს საწვავის მიწოდებას.
ისრაელის თავდაცვის ძალების განცხადებით, ორგანიზება გაუკეთეს საავადმყოფოსთვის დიზელის საწვავის მიწოდებას გადაუდებელი სამედიცინო მიზნებისთვის. მათივე განცხადებით, სპეცდანიშნულების რაზმმა 300 ლიტრი დიზელის საწვავი კვირას, 12 ნოემბერს, დილით მიიტანა.
ისრაელის თავდაცვის ძალებმა ასევე გაავრცელა ვიდეო, სადაც ჩანს, რომ ისრაელელი ჯარისკაცები საავადმყოფოს აწვდიან ბენზინის კონტეინერებს.
ისრაელის თავდაცვის ძალების სპიკერი აცხადებს, რომ აქვს მტკიცებულება, რომ „ჰამასმა“ ხელი შეუშალა საავადმყოფოსთვის საწვავის მიწოდებას.
