მრავალსაათიანი მოლაპარაკების შემდეგ შეიარაღებული კაცი, რომელიც ჰამბურგის აეროპორტის ასაფრენ ბილიკზე შეიჭრა და თავისი 4 წლის ქალიშვილი მძევლად გამოაცხადა, პოლიციას წინააღმდეგობის გარეშე ჩაბარდა.
ამის შესახებ Spiegel-ი წერს. პოლიციაში აცხადებენ, რომ ოპერაცია დასრულებულია. თურქული წარმოშობის 35 წლის კაცი ქალიშვილთან ერთად მანქანიდან გადმოვიდა და წინააღმდეგობის გარეშე ჩაბარდა.
ბავშვს ფიზიკური დაზიანება არ მიუღია.
შეგახსენებთ, რომ ოპერაცია შაბათს საღამოდან გრძელდებოდა. კაცმა მანქანა ასაფრენ ბილიკზე შეიყვანა და მძევლად გამოაცხადა 4 წლის ქალიშვილი, რომლის თურქეთში წაყვანა სურდა, თუმცა ცოლი ამაზე თანხმობას არ აძლევდა. გავრცელებული ცნობით, აეროპორტში კაცმა რამდენჯერმე გაისროლა.
ჰამბურგის აეროპორტმა 3200-ვე მგზავრისა და თანამშრომლების ევაკუაცია მოახდინა და მუშაობა შეაჩერა.
მოლაპარაკებები მთელი ღამის მიმდინარეობდა, რომელიც მეორე დღესაც გაგრძელდა.
