ღაზას სექტორის მაცხოვრებლები აცხადებენ, რომ გასულ ღამეს ისრაელის იერიშები იყო ყველაზე ინტენსიური ბოლო სამი კვირის განმავლობაში, ამის შესახებ BBC გამოცემა Haaretz-ზე დაყრდნობით იწუყება.
მოსახლეობის თქმით, ღაზას აღმოსავლეთ ნაწილი, განსაკუთრებით ჩრდილოეთი სექტორი, ჯაბალიას ლტოლვილთა ბანაკიდან ბეიტ ლაჰიასა და ბეიტ ჰანუნამდე, უწყვეტი დაბომბვის ქვეშ იყო. იერიშები იყო სექტორის ცენტრალურ ნაწილში და ხან იუნისში სამხრეთით. „ჰამასმა“ და „ისლამურმა ჯიჰადმა“ განაცხადეს, რომ ღაზას ჩრდილოეთით ისრაელის ჯარებთან ბრძოლა მიმდინარეობს.
„ჰამასის“ განცხადებაში ნათქვამია, რომ „ძალადობრივი შეტაკებები“ მიმდინარეობს ჩრდილოეთ ღაზაში მდებარე ბეიტ ჰანუნთან და ცენტრში, ბურეიჯთან. დამატებითი დეტალები იმის შესახებ, თუ რა ფორმით მიმდინარეობს შეტაკებები, უცნობია.
ასევე უცნობია რამდენი ადამიანი ემსხვერპლა ღამის იერიშებს, რადგან ადგილზე სამედიცინო ჯგუფებთან კავშირი შეწყდა კომუნიკაციის არარსებობის გამო.
გამოცემა ასევე წერს, რომ ექიმების ნაწილმა მასირებული იერიშების გამო ადგილამდე მისვლა ვერ შეძლო.
