ამერიკული გამოცემა The Washington Post-ი წყაროებზე დაყრდნობით წერს, რომ რუსი ულტრანაციონალისტი პროპაგანდისტის, ალექსანდრ დუგინის შვილი, დარია დუგინა უკრაინის უსაფრთხოების სამსახურმა ააფეთქა. მთავარი სამიზნე თავად ალექსანდრ დუგინი იყო.
გამოცემა რაიმე მტკიცებულებაზე არ საუბრობს.
ავტომანქანა, რომელშიც დარია დუგინა იმყოფებოდა, მოსკოვის რეგიონში 2022 წლის აგვისტოში ააფეთქეს. The Washington Post -ის ცნობით, მკვლელობის მცდელობის სამიზნე თავად ალექსანდრ დუგინი იყო, მისი ქალიშვილი კი შემთხვევით დაიღუპა. ასაფეთქებელი მოწყობილობის კომპონენტები რუსეთში, სავარაუდოდ, უკრაინის მოქალაქემ შეიტანა. გამოცემის ცნობით, მან ქალიშვილთან ერთად ქვეყანა აფეთქების შემდეგ მალევე დატოვა.
როგორც The Washington Post -ი წერს, უკრაინის უსაფრთხოების ძალებმა და დაზვერვის მთავარმა სამმართველომ ოკუპირებულ ტერიტორიებსა და რუსეთში ათობით ოპერაცია ჩაატარეს. სამიზნეებს შორის იყვნენ წყალქვეშა ნავის ყოფილი მეთაური, რომელიც კრასნოდარში, პარკში სირბილის დროს მოკლეს და სანქტ-პეტერბურგის კაფეში აფეთქებული სამხედრო ბლოგერი, ვლადლენ ტატარსკი.
უკრაინის ხელისუფლებას სტატიასთან დაკავშირებით კომენტარი ჯერ არ გაუკეთებია. თუმცა, მასალის მომზადებისას ჟურნალისტები დაუკავშირდნენ უკრაინის უსაფთხოების სამსახურის ხელმძღვანელს ვასილი მალიუკს, რომელმაც განაცხადა, რომ უსაფრთხოების სამსახურის ყველა სამიზნე სრულიად ლეგიტიმური იყო. ”სამართლიანი სასჯელი მისწვდება ყველა მოღალატეს, ომის დამნაშავეს და კოლაბორატორს,” - თქვა მალიუკმა.
