ბრიტანეთის სამხედრო დაზვერვა უახლეს ანგარიშში საუბრობს უკრაინის წინააღმდეგ ომში რუსეთის არმიის მნიშვნელოვნად გაზრდილ დანაკარგებზე.
ბრიტანელი ანალიტიკოსების აზრით, რუსული ჯარების ცოცხალი ძალის დანაკარგი 90%-ით გაიზარდა, ამას წინ უძღოდა წარუმატებელი თავდასხმები უკრაინის შეიარაღებული ძალების გამაგრებულ პოზიციებზე ავდიივკის რაიონში.
დაზვერვა რუსეთის შეიარაღებული ძალების დანაკარგების მიახლოებით რიცხვს ასახელებს.
დიდი ალბათობით, 2022 წლის თებერვალში რუსეთ-უკრაინის ომის სრულმასშტაბიანი შეჭრის დაწყებიდან, რუსული ჯარების დანაკარგები (მოკლულების და ქმედუუნარო დაჭრილების სახით) შეადგენს 150-190 ათასს ადამიანს.
ბრიტანული დაზვერვის შეფასებით დანაკარგების საერთო რაოდენობა, დროებით დაჭრილების (სამხედროები, რომლებიც გამოჯანმრთელდნენ და ბრძოლის ველზე დასაბრუნებლად მზად არიან) გათვალისწინებით შეადგენს 240-290 ათას ადამიანს. ამ რიცხვში შედის მხოლოდ რეგულარული ქვედანაყოფების სამხედრო მოსამსახურეები, დაჯგუფება „ვაგნერის“ მებრძოლების გამოკლებით.
