თურქეთიდან სამშობლოში დაბრუნებული პოლკ „აზოვის“ მეთაურები აცხადებენ, რომ საბრძოლო მოქმედებებში ჩაერთვებიან.

ლვივში გამართულ შეხვედრაზე „აზოვსტალის“ დამცველმა, დენის პროკოპენკომ თქვა, რომ ახლა მნიშვნელოვანია, რომ უკრაინის არმია სტრატეგიული ინიციატივა ხელში ჩაიგდო.

„ღრმად ვარ დარწმუნებული, რომ არმია გუნდურობას ნიშნავს და დღეიდან ჩენ ერთად გავაგრძელებთ ბრძოლას. ჩვენ კიდევ აუცილებლად ვიტყვით ჩვენს სიტყვას ბრძოლაში. მთავარია, რომ უკრაინის არმიამ მოიპოვა სტრატეგიული ინიციატივა ფრონტის ხაზზე და ყოველ დღე წინ მივიწევთ, ვანადგურებთ მტერს, ვათავისუფლებთ დროებით ოკუპირებულ ტერიტორიებს.

და ჩვენ ყველაფერ შესაძლებელს და შეუძლებელს გავაკეთებთ, რომ დავაჩქაროთ ეს პროცესი, რათა ომი მივიდეს ლოგიკურ დასასრულემადე“, - განაცხადა დენის პროკოპენკომ.

დენის პროკოპენკო და „აზოვის“ კიდევ ოთხი მეთაური უკრაინის პრეზიდენტთან, ვოლოდიმირ ზელენსკისთან ერთად თურქეთიდან სამშობლოში დაბრუნდნენ. „ზოვსტალის“ დამცველები 2022 წლის სექტემბრის შემდეგ თურქეთში იმყოფებოდნენ. ისინი თურქეთის პრეზიდენტის, რეჯეფ თაიფ ერდოღანის შუამავლობით დადებული შეთანხმების ფარგლებში გათავისუფლდნენ რუსეთის ტყვეობისგან. მაშინ შეთანხმების ერთ-ერთ პირობად დასახელდა, რომ „აზოვის“ მეთაურები საბრძოლო მოქმედებების დასრულებამდე თურქეთში დარჩებოდნენ.