კახოვკის კაშხლის აფეთქება არის ტერორისტული აქტი უკრაინის კრიტიკული ინფრასტრუქტურის წინააღმდეგ, – ამის შესახებ გაერო-ში უკრაინის ელჩმა, სერგეი კისლიცამ განაცხადა გაერო-ს უშიშროების საბჭოს სხდომაზე, სადაც კახოვკის კაშხლის აფეთქების შესახებ იმსჯელეს.
სერგეი კისლიცამ განაცხადა, რომ რუსეთისთვის დამახასიათებელია მსხვერპლის საკუთარ დანაშაულში დადანაშაულება და აღნიშნა, რომ რუსეთი წელიწადზე მეტია აკონტროლებს კაშხალს და კიევისთვის ფიზიკურად შეუძლებელი იყო მისი აფეთქება.
„რუსეთი წელიწადზე მეტია, აკონტროლებს კაშხალს და მთელ კახოვკის ჰესს. ფიზიკურად შეუძლებელია მისი აფეთქება გარედან დაბომბვით. ის დანაღმული იყო რუსი ოკუპანტების მიერ და მათ ააფეთქეს“, – აღნიშნა სერგეი კისლიცამ.
კისლიცას თქმით, რუსეთი კვლავ "ტყუილების ტალახში იძირება".
დიპლომატის თქმით, აღნიშნული აქტი მიზნად ისახავს, რაც შეიძლება მეტი სამოქალაქო მსხვერპლისა და განადგურების გამოწვევას რუსეთის მხრიდან.
„გადამწვარი მიწის ტაქტიკის გამოყენებით, ამ შემთხვევაში დატბორილი მიწის ტაქტიკის გამოყენებით, რუსმა ოკუპანტებმა, ფაქტობრივად, აღიარეს, რომ დატყვევებული ტერიტორია მათ არ ეკუთვნით და არ შეუძლიათ ამ მიწების დაკავება“, – აღნიშნა კისლიცამ.
