რუსეთის საოკუპაციო ძალებმა ხერსონში ოსტროვის მიკრორაიონს ცეცხლი იმ დროს გაუხსნეს, როდესაც კახოვკის ჰესის აფეთქების გამო დატბორილი ადგილებიდან მოსახლეობის ევაკუაცია მიმდინარეობდა. დაჭრილია ორი სამართალდამცველი. ამის შესახებ ხერსონის ოლქის სამხედრო ადმინისტრაციის ხელმძღვანელმა ოლექსანდრ პროკუდინმა განაცხადა.
„ხალხს ვეხმარებით ევაკუაციაში. ამ მძიმე დროს კი რუსებმა შეგვახსენეს, რასაც წარმოადგენენ სინამდვილეში - ტერორისტებს.
ევაკუაციის დროს ოკუპანტებმა მიკრორაიონს საარტილერიო ცეცხლი გაუხსნეს - დაიჭრა ორი სამართალდამცველი, რომლებიც ხალხს საშიში ტერიტორიის დატოვებაში ეხმარებოდნენ“, - განაცხადა პროკუდინმა.
მან აღნიშნა, რომ მიკრორაიონი ყოვედღიურად იბომბება. მისი თქმით, დატბორილი ტერიტორია იმდენად მასშტაბურია, რომ ზოგი ადგილიდან ავტოტრანსპორტით გამოსვლა შეუძლებელია.
მისივე თქმით, დღის განმავლობაში ხერსონიდან 1300 ადამიანი გაიყვანეს.
