ევროკავშირის საგარეო საქმეთა მინისტრები შუამავლების ჯგუფს ქმნიან, რომელიც საქართველოს პოლიტიკური კრიზისის მოგვარებაში დაეხმარება. ამის შესახებ ლიეტუვის საგარეო საქმეთა მინისტრმა, გაბრიელიუს ლანდსბერგისმა განაცხადა.
კითხვაზე, აპირებს თუ არა საქართველოში ვიზიტს, ლანდსბერგისმა უპასუხა, რომ საქართველოში, სადაც პოლიტიკური კრიზისია, შესაძლოა ევროკავშირის უფრო დიდი დელეგაცია ჩავიდეს.
"იგეგება საქართველოში გამგზავრება. ახლა ვმსჯელობთ იმაზე, თუ რამდენად სასარგებლო იქნება ეს ვიზიტი. საგარეო საქმეთა მინისტრებისგან შუამავლების ჯგუფი იქმნება და ის აუცილებლად მოიცავს ერთზე მეტ ქვეყანას", - განაცხადა ლანდსნერგისმა.
ლიეტუვის საგარეო საქმეთა მინისტრის განცხადებით, მნიშვნელოვანია საქართველოსთვის სიგნალის გაგზავნა მოხდეს არა მხოლოდ ლიეტუვიდან.
"ეს უნდა იყოს საერთო ევროპული სიგნალი, რადგან ჩვენ ვსაუბრობთ საქართველოს ევროპულ და ტრანსატლანტიკურ სტრუქტურებში ინტეგრაციაზე", - განაცხადა გაბრიელიუს ლანდსბერგისმა.
