დღეს, 31 იანვარს, ევროპარლამენტი განიხილავს რეზოლუციას, რომლის თანახამად, ვენესუელის დროებით პრეზიდენტად ხუან გუაიდოს აღიარება მოხდება.
პროექტის ტექსტი ევროპარლამენტის დოკუმენტების ბაზაში გამოქვეყნდა.
„ევროპარლამენტი აღიარებს გუაიდოს ვენესუელის ბოლივარული რესპუბლიკის კანონიერ დროებით პრეზიდენტად და მხარს უჭერს მისი მოქმედების გეგმას“, - ნათქვამია რეზოლუციის ტექსტში.
პროექტის ავტორები ევროკავშირის საგარეო და თავდაცვის პოლიტიკის უმაღლეს წარმომადგენლებსა და ევროკავშირის წევრ-ქვეყნებს მოუწოდებენ „მიიღონ ძლიერი, ერთიანი პოზიცია და აღიარონ ხუან გუაიდო ქვეყნის ერთადერთ, კანონიერ დროებით პრეზიდენტად ახალ, თავისუფალ საპრეზიდენტო არჩევნებამდე“.
პროექტს ავტორები ასევე მიესალმებიან იმ სახელმწიფოებს, რომლებმაც გუაიდო დროებით პრეზიდენტად აღიარეს.
შეგახსენებთ, რომ გაეროს ინფორმაციით, სულ მცირე 40 ადამიანი დაიღუპა და 850-მდე პირი დაპატიმრებულია ვენესუელაში საპროტესტო აქციების მიმდინარეობისას.
23 იანვარს კარაკასში ვენესუელის ამჟამინდელი პრეზიდენტის ნიკოლას მადუროს წინააღმდეგ მასშტაბური საპროტესტო აქციები დაიწყო. იმავე დღეს, ვენესუელის ეროვნული ასამბლეის პრეზიდენტმა, ოპოზიციის ლიდერმა ხუან გუაიდომ თავი ქვეყნის დროებით პრეზიდენტად გამოაცხადა.
შეერთებულმა შტატებმა, კანადამ, ბრაზილიამ, არგენტინამ, საქართველომ და სხვა ქვეყნებმა აღიარეს ხუან გუაიდო ვენესუელის დროებით პრეზიდენტად და მოუწოდეს ნიკოლას მადუროს, ხელი არ აღემართა ვენესუელაში მიმდინარე საპროტესტო აქციების მონაწილეების წინააღმდეგ. თავის მხრივ ნიკოლას მადურომ უზენაეს სასამართლოში სიტყვით გამოსვლისას კიდევ ერთხელ გამოაცხადა თავისი ლეგიტიმურობა და გუაიდოს "აშშ-ის მარიონეტი" უწოდა.
ხუან გუაიდოს მხარდაჭერას უცხადებენ ასევე ევროკავშირში. ამასთან საფრანგეთმა ხუან გაიდოს დროებით პრეზიდენტად აღიარების პირობა დაასახელა.
ნიკოლას მადუროს პრეზიდენტობის ლეგიტიმურობას აღიარებენ რუსეთი, ბოლივია, თურქეთი, სირია, მექსიკა, კუბა და ბელარუსი.
